Veteranu nia Oan 100 Tuir TPA ba ITS

0
208
Autoridade timoroan hasai foto hamutuk ho koordenadór selesaun bolseiru hosi Indonézia. Foto Tatoli/Rafy Belo

DILI, (TATOLI) – Veteranu no kombatente nasionál nia oan na’in 100 tuir Test Potencial Academy (TAP) hodi hasai kursu lisensiatura área enjeñaria iha Institut Teknologi Sepuluh Nopember (ITS), Surabaya-Indonézia, iha salaun Pusat Kebudayaan Indonesia, Mascarenhas, tersa (18/4).

Sekretáriu Ezekutivu FDCH (Fundo Desenvolvimento Capital Humano), Isménio Martins ba jornalista sira bainhira partisipa abertura teste ba veteranu nia oan na’in 57 hodi hasai lisensiatura iha médiku veterináriu.

Desizaun ikus bazeia ba kandidatu sira nia rezultadu. “Entaun iha TAP ne’e kompostu husi pergunta 60, teste lian Indonézia, Matemátika ho Lojika. Kada minute ida pergunta ida, tenke responde”, informa. Teste ne’e sei fó diretamente husi reprezentante ITS.

Entretantu, segunda (17/4) iha fatin ne’ebé hanesan hala’o mós TAP ba veteranu no kombatente nasionál nia oan na’in 57 hodi kompete ba vaga sanulu hodi estuda kona-ba médiku veterináriu iha Universidade Udayana Bali, Indonézia.

Bolsa ne’e fó sai tuir prioridade husi Ministériu Agrikultura no Peska (MAP), Diresaun Pekuária no Veterinária ne’ebé presiza médiku veterináriu na’in 32 tuir prioridade durante tinan lima nia laran.

Médiku veterináriu ne’e MAP husu hamutuk 32, maibé agora vaga ne’ebé mak fó uluk ona 10 tanba desizaun husi Konsellu Administrasaun FDCH.

“Fó uluk vaga 10 atu haree sira nia perkembangan (progresu-red) durante semester ida primeru, agora tinan ne’e depois deside fali, serake tinan oin bele fó tan vaga 22 atu kompleta nesesidade MAP”, haktuir.

Durasaun kursu tinan haat depende universidade sira nia kritériu no prosesu estudu tomak.

“Tuir lei bolsa estudu iha dekretu lei nú. 30/2008 katak se nia kursu ba tinan haat, governu sei fó tan tinan ida tanba haree ba prosesu integrasaun, adapatsaun, hanesan ba iha kursu língua i kursu siénsia bázika ne’ebé ita prepara”, esplika.

Tinan ne’e nu’udar prosesu atu estudante sira bele hadi’a liutan língua no siénsia bázika. “Ne’e duni, ita sei fó totál kontratu ba bolseiru sira, sei asina ho FDCH no Ministru Planeamentu Investimentu Estratéjiku ne’ebé mak durante tinan lima nia laran”, esplika.

Programa bolsa ne’e bazeia ba desizaun Konsellu Administrasaun FDCH ne’ebé integra iha MPIE (Ministériu Planeamentu Investimentu Estratéjiku), lideradu husi eis-primeiru-ministru, Kay Rala Xanana Gusmão ne’ebé hala’o iha 3 outubru 2016.

Membru konsellu Administrasaun ne’e mak hanesan Ministra Finansa, Ministru Edukasaun, Ministru Petróleo, Ministru Justisa no SEPFOPE (Sekretáriu Estadu Polítika Formasaun Profesionál no Empregu).

Kuantidade orsamentu hira mak sei hetan husi bolseiru sira, Isménio hatete sei aplika tuir dekretu lei nú. 30/2008. Dekretu ne’e esplika katak komponente ne’ebé mak iha bolsa estudu mak bolseiru tenke iha direitu ba propina, materiál didátiku, tratamentu saúde, kustu vida inklui alojamentu.

Kustu universidade ninian hanesan propina nomós seluk sei selu iha kursu prátika sei selu diretamente ba universidade.

Bolseiru sira sei simu kustu vida nian kada fulan neen, tuir kondisaun moris Indonézia nian. “Tuir saláriu mínimu, purezemplu iha Bali Rp. 2.000.700 nune’e mós iha Surabaya maibé ita fó purvolta US$ 300 ba sira-nia vida”, haktuir.

Nia halo komparasaun katak iha Indonézia dolár 300, multiplika ba kursu Rupiah entaun hetan di’ak oituan, sira bele foku atu estuda.

“Ne’e duni ho materiál didáktiku fulan neen dala ida ho dolár 100 atu bele hola sira-nia livru, iha mós ita fó tratamentu saúde fulan neen dala ida para bainhira sira moras karik sira bele hetan tratamentu rasik husi médiku sira”, esplika tan.

Kona-ba mekanismu kooperasaun, kontratu entre FDCH ho Udayana ho ITS. Seluk, kontratu ho bolseiru rasik ne’ebé ko’alia kona-ba direitu, obrigasaun nomós ho responsabilidade hohotu ninian.

Responsabilidade FDCH ninian mak atu tau-matan, serbisu ho konsuladu no embaixada Timor-Leste nian iha Indonézia. FDCH mós halo koordenasaun ho KBRI (Kedutaan Besar Repúblik Indonesia).

Universidade sira nia obrigasaun mak tau-matan ba estudante sira durante prosesu estudu, haree dezempeñamentu akadémiku ne’ebé mak sira tenke fó mai FDCH atu bele akompaña nafatin progresu estudante sira nian.

Ba estudante sira tenke estuda didi’ak, labele viola kontratu hodi bele kontribui rasik ba sira-nia aan nomós aban bainrua ba sira-nia família. “Ne’e duni, FDCH kontratu ho bolseiru sira nomós ho universidade”, katak.

Koordenadór selesaun estudante husi Udayana, Iputu Ari Sandaya iha nia intervensaun hateten kontente ho kooperasaun ida ne’e liliu bele fó biban ba sira hodi eduka, orienta estudante timoroan sira hodi sai lisensiadu iha médiku veterináriu nian.

Nia espera kooperasaun ne’e bele hala’o kontinuadamente no sira nia parte prontu nafatin atu ajuda.

Ba kandidatu sira ne’ebé tuir teste nu’udar prosesu inisiál, bainhira susesu estudu bele kontribui ba Nasaun hodi prense indepedénsia.

Rezultadu teste sei fó sai iha 20 abril. Ekipa juri kompostu husi universidade, reprezentante Ministériu Edukasaun (ME) no Ministériu Solidaridade (MSS) ne’ebé mak toma konta kona-ba asuntu veteranu kombatente nomós sekretáriadu Fundo Desenvolvimento Capital Humano (FDCH).

Universidade sei entrega rezultadu ba FDCH hodi fó sai kandidatu ne’ebé mak hetan susesu iha prosesu selesaun TAP.

Jornalista: Rafy Belo

Editora: Rita Almeida

HUSIK IDA HATÁN