Universitáriu Kria Kampus Ministru Hodi Hakbiit Vida Espirituál

0
88
Juventude iha vida espirituál. Foto google

DILI, (TATOLI) – Estudante sira husi universidade públika no privada iha Díli laran ho inisitiva rasik kria Kampus ministru ho atividade espirituál oioin, la haree ba relijiaun, hodi hakbiit vida espirituál idaidak nian no halo konsellu ba foinsa’e kona-ba oinsá moris iha sosiedade.

Konselleira Kampus Ministru, Palmira Amaral. Foto Espesiál

“Ohin loron vida sarani joven sira nian laduun loos ona tanba ne’e inisitiva ida ne’e, hanesan joven, ho fuan  no sentimentu ne’ebé profunda hakarak ajuda ami-nia belun sira, liliu belun joven universitáriu sira atu bele forma sira-nia moris liliu iha vida espirituál ne’ebe di’ak”, konselleira Kampus Ministru, Palmira Amaral ba Ajénsia Tatoli iha igreja Motael, tersa (4/4).

Vida sarani ne’ebé laduun loos ona ba joven sira nu’udar estudante, tuir konselleira ne’e hanesan tempu livre estudante sira konta de’it istória, ba tuur halimar iha tasi-ibun, deskonfia iha feto estudante sira balun hahú fuma, mane sira dalaruma buka lanu to’o estudante feto eh mane bosok inan-aman dehan ba kampus maibé realidade lae.

Inisitiva ne’e atu sujere no akonsella joven no universitáriu sira atu kontinua halo buat ne’ebé di’ak tuir idaidak nia fiar, aproveita tempu livre ba biblioteka no estuda, hakbesik aan nafatin ba uma kreda no ajuda inan-aman bainhira iha tempu livre.

“Joven ohin loron, buat ida espirituál ne’e sira la gosta. Entaun, ami-nia espíritu ida ne’ebé atu ajuda ne’e maka’as, ami nafatin la para, halo nafatin kontinuasaun hodi tulun joven sira maske partisipasaun laduun maksimu”, hatutan.

Partisipasaun joven no universitáriu sira ne´ebé menus maibé kada semana, iha kada sesta, Kampus Ministru kontinua hala’o atividade no la para ho nune’e, to´o agora kada joven no universitáriu sempre aumenta hodi bele halo transformasaun ba moris.

Atividade ne’e mak halo orasaun hamutuk, fahe esperiénsia nomós aprende bíblia, fahe hanoin, fó treinamentu kona-ba evanjellu no halo prátika ba tuun iha baze, vizita pastorál ba komunidade, universidade depois joven sira ne´ebé hetan treinamentu ne’e prátika (La’os seita). Hanesan ne’e no ba kontinua ba nafatin.

Envolve mós iha atividade relijioza sira hanesan retiru, reflesaun tuir nia vizaun no misaun atu bele halo mudansa no hakbiit nia vida espirituál. “Ida ne’e mak ami-nia hakarak Maromak nia futar liafuan ne’ebé sai husi evanjellu sei muda ema nia hanoin”, akresenta.

Vizaun mak hakarak ema hothotu liliu sarani Timor-Leste laran tomak, la’ós Katóliku de’it ba transformasaun vida espirituál ne’ebé di’ak.

Atu atinji vizaun, sira hala’o misaun tuir evanjellu Saun Mateus, 28:19-20 katak: “Ba iha mundu tomak haklaken ha’u-nia evanjellu, hanorin sira sai ha’u-nia eskolante no haruka sira halo tuir saida mak ha’u halo”.

Kampus Ministru molok hamriik ketak, antes ne’e serbisu hamutuk ho organizasaun ida naran East Timor Campus for Cristh (ETCC) no la’o hamutuk ho DEJUKDIL (Departamentu Juventude Katólika Díli).

Jornalista: Rafy Belo

Editora: Rita Almeida

HUSIK IDA HATÁN