Tribunál Bele Interven Artigu 1475 Kuandu Vítima Keixa

0
103
Diretór Exekutivu JSMP, José de Oliveira Sampaio. Foto Facebook José de Oliveira Sampaio.

DILI, (TATOLI) – Diretór Ezekutivu Judisial System Monitoring Program (JSMP), José de Oliveira Sampaio enkoraja vítima ne’ebé sente afeitadu ba implementasaun artigu 1475, lei kódigu sivíl bele aprejenta ba Tribunál hodi halo intervensaun.

“Mesmu laiha mekanismu proprio ida tuir lei, maibé se ema ruma ou individu ka família ka grupu ruma afeitadu hosi artigu ne’e bele aprejenta ba Tribunál atu husu Tribunál nia intervensaun kona-ba kazu ne’e”, José de Oliveira Sampaio informa ba TATOLI iha nia kna’ar fatin Kolmera, tersa (18/4).

Tuir nia observasaun, artigu 1475 pontu 2 ne’ebé hateten iha lian Portugués “A Lei Civil reconhese valor e eficácia de casamento ao matrimónio católico e ao matrimónio barlaqueado monogâmico, nos termos das disposições seguintes” (lei sivíl rekoñese valór efikasia kazamentu matrimóniou Katólika no matrimónio barlakiadu monogâmiko, tuir termu sira ne’ebé tuir mai) presiza revee.

Razaun fundamentál la-kumpri dever tuir konstituisaun ne’ebé rekoñese kualker relijiaun ka fiar sira seluk ne’ebé moris iha Nasaun. “Artigu ne’e klaru katak, kontrariu ho ita nia konstituisaun”, salienta.

Konstituisaun RDTL artigu 12 kona-ba Estadu no relijiaun sira haktuir katak, Estadu laiha relijiaun ofisial; Estadu respeita fiar oin-oin ne’ebé sira nia organizasaun iha liberdade atu hala’o atividade relijiosa sira, ne’ebé buka halo tuir nafatin Lei Inan no Lei Oan sira; Estadu hala’o kna’ar hamutuk ho instituisaun fiar relijiaun oin-oin, ne’ebé hakarak servi ba povu Timor-Leste nian di’ak no Instituisaun Relijiaun idak-idak iha direitu atu hetan soin hodi hala’o nia objetivu.

Komunidade ne’ebé fi’ar iha Protestante no Musulmanu sente implementasaun hosi artigu ne’e ignora direitu nu’udar sidadaun, tanba ne’e tempu besik sei aprejenta karta protesta ba Parlamentu Nasionál nu’udar reprejentante povu.

Jornalista: Manuel Pinto

Editora: Rita Almeida

HUSIK IDA HATÁN