Traballadór Timoroan iha Korea Sul Seidauk Ameasadu

0
662
Sekretáriu Estadu Polítika, Formasaun Profesionál no Empregu (SEPFOPE), Ilídio Ximenes. Foto SEPFOPE

DILI, (TATOLI) – Sekretáriu Estadu Polítika, Formasaun Profesionál no Empregu (SEPFOPE), Ilídio Ximenes hateten traballadór timoroan iha Korea Sul kontinua serbisu no seidauk hetan ameasa sériu.

“Atu evakua ema sai, ita iha diplomata atu haree buat hirak ne’e, traballadór timoroan sira kontinua serbisu buka osan nafatin, loron boot mós sira kontinua buka osan no haruka mai família sira”, katak ba jornalista sira iha Delta Nova, kinta (27/4).

Iha fatin hanesan, Sekretáriu Jerál Konfederasaun Sindikatu Timor-Leste (KSTL), José Conceição da Costa hateten tensaun entre Korea Norte no Amérika fó ona impaktu ba mundu inklui Timor-Leste.

“Governu liuhosu MNEK (Ministériu Negosiu Estranjeiru no Koperasaun) agora dadaun servisu hela, hanesan organizasaun sosiedade sivíl, sindikatu husu atu komunikasaun kontinua la’o atu labele fó impaktu ba traballadór timoroan sira”, katak ba jornalista sira iha Delta Nova.

Nia hatutan, família balun iha área remotas tenke hetan informasaun atu labele pániku, hein katak tensaun ne’e bele tun no labele mosu funu iha mundu.

“Husu ba governu atu nafatin halo komunikasaun entre ita nia adidu iha ne’eba atu bele akompaña situasaun ne’e, karik akontese problema ruma ita mos tenke iha preparasaun atu salva sira”, katak tan.

Jornalista: Julia Chatarina

Editora: Rita Almeida

HUSIK IDA HATÁN