Taur Promete Entrega Servisu ho Responsabilidade

0
112
Prezidente eleitu, Francisco Guterres Lu-Olo ho Prezidente sesante, Taur Matan Ruak hasoru malu iha Palásiu Prezidensiál foin lalais ne'e. Foto espesiál

DILI, (TATOLI) – Prezidente Repúblika, Taur Matan Ruak promete sei entrega servisu ba Prezidente eleitu, Francisco Guterres Lú-Olo ho di’ak no responsabilidade.

“Prezidente dala ida tan garante mai ha’u katak servisu tranzisaun no sei entrega servisu sira ho di’ak mai hau”, Lú-Olo ba jornalista sira hafoin hasoru malu ho Xefe Estadu iha Palásiu Prezidensiál Bairopite, sesta, (21/4).

Parte rua konkorda ona atu ekipa tranzisaun hahú servisu iha loron 24 fulan-abril 2017 to’o inisiu fulan-maiu. ʺEkipa tranzisaun sei lidera hosi Francisco de Vasconcelhos ho ema nain ualu”.

Parte seluk, Lú-Olo hatutan posilidade sei kontinua implementa programa premiu nutrisaun no seluk tan ne’ebé durante ne’e ínisia hosi Prezidente Taur Matan Ruak.

“Ita haree programa sira ne’e di’ak nusa maka ita la-kontinua, ha’u nia ekipa tranzisaun sei haree buat sira ne’e hotu depois maka halo avaliasaun internál”, katak tan.

Xefe Cása Sivíl Prezidente Repúblika, Rui Gomes hateten, nia parte oras ne’e hala’o ona preparasaun fatin hodi simu ekipa tranzisaun hosi Prezidente eleitu, Francisco Guterres Lú-Olo ne’ebé iha segunda semana oin hahú ona servisu.

ʺSegunda feira (24/4) sira tama mai ami deskute preparasaun para buat hotu la’o di’akʺ, tenik.

Jornalista: Agapito dos Santos

Editora: Rita Almeida

HUSIK IDA HATÁN