iklan

EDUKASAUN

Taur: Ita Halo Buat Ne’ebé Imposível Sai Posível

Taur: Ita Halo Buat Ne’ebé Imposível Sai Posível

Prezidente atuál akompaña hosi Xefe Estadu eleitu bainhira dada-lia ho jornalista sira iha Palásiu Prezidensiál, tersa, (11/4). Foto Tatoli/António Goncalves

DILI, (TATOLI) Prezidente Repúblika, Taur Matan Ruak hateten katak durante prosesu luta ba libertasaun nasionál nasaun boot sira konsidera no la fiar katak ita bele hetan ukun rasik aan, maibé ita halo buat ida imposível sai posível tanba iha fé no objetivu.

“Iha forsa atu luta, iha fiar atu manan. Ita manan duni, ita sai nasaun ida”, haktuir prezidente iha Kampus UNDIL, Mascarenhas, foin lalais ne’e.

Tanba ne’e, husu ba sívita akadémika no sosiál tomak atu kontinua iha espiritu luta nian no halo investimentu maka’as iha edukasaun liuhusi dalan serbisu maka’as.

To’o agora Orsamentu Jerál Estadu (OJE) maioria maihusi mina ka petróleo. Ho situasaun ida ne’e, PR husu atu halo investimentu ida ne’ebé maka’as ba edukasaun hodi produz ema ho kualidade.

“Ha’u hanoin, ita tenke iha polítika ida. Investe iha edukasaun taka matan, ita bele out source, ita bele lori ema matenek mai iha ne’e, reforsa universidade sira iha ne’e,” Taur akresenta.

Eis-veteranu ne’e, dezafia mós graduadu no estudante UNDIL sira atu kontinua reforsa sira-nia identidade no kontinua rekoñese nia orijin katak estuda no mai husi fatin ida ne’ebé no agora iha ne’ebé ona.

“Nune’e, imi iha identidade ida. Iha fatin-fatin maibé ema koñese katak imi mak ne’e”, nia dezafia.

Kompara ho nasaun sira iha mundu inklui Timor-Leste ne’ebé nia hetan sira-nia indepedénsia ka ukun rasik aan liuhusi situasaun ida ne’ebé difísil, ikus mai bele realiza sira-nia interese ne’e nasaun luta na’in. “País hotu ne’ebé mak terus mak manan ne’e luta na’in”, kompara.

Tanba ne’e, PR Taur sujere atu kontinua nafatin luta maka’as hodi realiza futuru.

Prezidente Boakril, UNDIL, José Agostinho Belo hateten ba estudante no estrutura sira UNDIL nian katak atu aprende no estuda portugés la presiza tenke ba Portugal maibé, iha ita-nia rain mós bele aprende no ko’alia Portugés.

“La’ós ba Portugal mak aprende portugés, iha ita-nia rain, iha vontade. Ita bele”,  hateten Prezidente Boakril ne’e.

Nia haktuir, UNDIL mós antes ne’e sujere mós nia hanoin ho entidade sira seluk atu hamutuk ho governu hodi sujere ba CPLP (Comunidade dos Países da Língua Portuguesa) atu muda nia filozofia no karakter, katak Nasaun Unida uza mós lian portugés nu’udar lian ofisiál ida iha organizasaun mundiál ne’e.

“Ne’e hanesan buat ki’ik oan ne’ebé ita halo maibé buat ne’ebé mak ita iha, ami hakarak kontribui mós”, tenik.

Prezidente Boakril mós akresenta katak la to’o iha situasaun ida ne’e de’it. “Ami sente katak ita-nia heroi sira, ita-nia hanoin sira, ema sira ne’ebé iha poténsia para bele dudu mós joven sira para aprende”, salienta.

Nia reforsa, UNDIL ho nasionalizmu no patriotizmu ne’ebé mak iha hakarak kontribui mós ba Timor-Leste hodi sai nasaun boot.

Jornalista: Rafy Belo

Editora: Rita Almeida

iklan
iklan

Leave a Reply

iklan
error: Content is protected !!