Taur Enkoraja Estudante Estuda Maka’as

0
29
Prezidente Repùblika, Taur Matan Ruak. Foto Tatoli

DILI, (TATOLI)Prezidente Repùblika, Taur Matan Ruak bainhira iha nia intervensaun aula jerál ne’ebé hala’o iha Universidade de Díli (UNDIL) foin lalais ne’e, husu ba estudante sira tenke estuda maka’as sai ema ne’ebé util ba família, sosiedade no Nasaun.

“Imi tenke estuda, estuda no estuda maka’as. Estuda to’o dukur no estuda nafatin to’o mate”, nia enkoraja.

Tuir eis-major jenerál ne’e, tempu estuda nu’udar estudante presiza estuda keta halo fali polítika, ba fali namora tanba ida ne’e lakon tempu de’it. Bainhira lakon tempu, bainhira atu buka osan sei hasoru problema.

“Tanba ne’e, imi tenke hanoin katak saida mak util ba ha’u-nia aan, ha’u-nia família no ba ha’u-nia Nasaun. Saida mak útil para ema hanoin ita iha família no iha sosiedade”, enkoraja tan.

Moris ne’e kompetisaun. Toba sedu, hadeer tarde buat ida ne’ebé tenke muda katak toba tarde maibé hadeer sedu, nune’e bele manan kompetisaun moris nian. Vida ne’e halai taru, se lakohi ikus tenke hahú agora kedas.

“Imi ha’u-nia oan feto no mane tenke eskola maka’as. Ne’e imi bele sai, la’ós negativa maibé pozitiva. Imi tenke iha hanoin, mehi atu kompete no ser o melhor (sai di’ak liu)”, tenik tan.

Taur Matan Ruak mós afirma katak pasadu ne’e referénsia ida atu luta maka’as alkansa futuru tanba prezente la iha. Ne’e dalan, jornada, viajen konstanta atu ita buka ida ne’ebé di’ak liu.

Pasadu hanesan referénsia hodi haree futuru. Nune’e, inan-aman bele dehan vale apena terus, vale apena luta, goza vantajen husi sofrimentu ne’e. “Ha’u husu ba imi para kontinua luta nafatin konta ho ha’u-nia apoiu”, Taur husu.

Mehi halo oinsà atu halo to’o moris di’ak hodi kompete, iha naran no lian, lian iha Ázia tanba apesar de rai pedasauk ida, illa Timor maibé orgullu tanba indepedénsia ne’e ema la oferese de’it. “Ita sosa rasik husi raan tanba ne’e ita iha autoridade polítiku, moral iha voz iha mundu,” katak tan.

Prátika demokrasia buat ida, ko’alia demokrasia buat ida, defende demokrasia buat seluk ida. Espíritu luta nian labele lakon. “Tanba ne’e, ha’u enkoraja ha’u-nia oan feto no mane estudante sira, favor ida ajuda imi nia maun sira. Imi orgullu, imi iha privilejiu tanba sira fó tempu hanorin imi”, apela.

“Jornada ba oin sei difísil, labele lakon espíritu luta, luta nafatin, sai servidór para ita nasaun mós mellor, iha lian no naran iha rejiaun ida ne’e”, apela tan.

Jornalista: Rafy Belo

Editora: Rita Almeida

HUSIK IDA HATÁN