Suku Bahamori-Grupo Feto HAFUCO Manan Prémiu Nutrisaun 2017

0
56
Manan nain sira ba prémiu nutrisaun Prezidensiál 2017. Foto mídia Palásiu Prezidensiál

DILI, (TATOLI) – Suku Bahamori, postu administrativu Venilale, munisípiu Baucau no Grupo Feto HAFUCO Triloka, postu administrativu Baucau manan prémiu nutrisaun Prezidente Repúblika 2017.

Suku Bahamori manan ho kategoria nutrisaun lideransa nasionál no Grupu Feto Hafuco manan kategoria família saudavél ho valór US$10.000 no sertifikadu inklui plaka.

Prezidente Repúblika, Taur Matan Ruak agradese ba manan nain sira tanba hatudu ona lideransa hodi mobiliza  no organiza komunidade hasae produsaun hodi kombate problema nutrisaun la-di’ak iha rai laran.

“Mai ita hotu kontinua servisu hamutuk hodi luta hasoru problema mal-nutrisaun iha rai laranʺ, apela Xefe Estadu durante fahe prémiu iha Palásiu Prezidenziál Bairopite, kinta (27/4).

Okaziaun ne’e,  fahe mós sertifikadu, plaka  no osan US$1200.00 ba suku haat no grupu haat seluk ne’ebé tama iha kategoria prémiu nutrisaun lideransa nasionál no família saudavél.

Suku haat seluk ne’e hanesan, suku samalariu, postu administrativu Baucau, munisípiu Baucau, suku Bahu, postu administrativu Baucau Villa, suku Fuat, postu administrativu Iliomar Lautem no suku Caicua, postu administrativu Vemasse, munisípiu Baucau.

Enkuantu, Grupu Feto haat seluk ne’e hanesan Bermuttuh Vaviquina, postu administrativu Maubara, munisípiu Baucau, REDECO suku Riheu, munisípiu Ermera, HUMBOE munisípiu Ermera no PHPN Lavateri, postu administrativu Baguia, munisípiu Baucau.

Ekipa júri  ba programa ne’e husi Gabinete Prezidensia Repúblika, Ministériu Saúde, Agrikultura, Edukasaun, sosiadade sivíl no seluk tan.

Programa ne’e hetan apoiu orsamentu husi Governu Austrália, komunidade Uniaun Europeia.

Seremonia ne’e  fahe mós sertifikadu ba bainaka no família ne’ebé akompaña no simu Prezidente Repúblika durante programa vizita suku durante mandatu tinan lima.

Entretantu, grupu Feto HAFUCO Triloka  sei uza osan ho valór US$10.000 hodi dezenvolve programa nutrisaun.

Kordenadora Grupu, Maria Idalina da Costa Tilman hato’o: ʺHo osan ida ne’ebé ohin ami simu sei hadi’a di’ak liutan ami atividade iha ami nia grupu”.

Atividade ne’ebé hala’o mak hakiak animál lokál, ai-horis, produsaun aihan lokál ba aihan modernu, agrikultura no rai no fó impresta osan ba membru grupu no promosaun aihan lokál.

Grupu ne’e hahú moris iha 2014 ho membru hamutuk 14 kompostu husi feto nain sia no mane lima.

Jornalista: Agapito dos Santos

Editora: Rita Almeida

HUSIK IDA HATÁN