SLB Laulara Lakohi Difikulta João Pedro

0
162
Dirijente no jogadór sira AD SLB Laulara iha Estádiu Munisipál Dili, foin lalais ne´e. Imajen Ajénsia TATOLI/Xisto Freitas

DILI, (TATOLI) – Sekretáriu Ezekutivu AD SLB Laulara, Domingos Caeiro hateten jogadór médiu avansadu SLB, João Pedro Freitas asina kompromisu estájiu ho Sporting Clube de Braga Portugal la’ós orgullu ba SLB de’it maibé ba Timor tomak.

£Ne´e hatudu ba mundu tomak katak timoroan mós talentu di’ak iha área futeból. Tanba ne’e, SLB parte ida orgullu maibé ami sente katak timoroan tomak mós tenke orgullu”, Domingos dehan ba jornalista sira iha Hotel Timor, foin lalais, hafoin asisti seremónia kompromisu estájiu entre jogadór João Pedro Freitas (10) ho Prezidenti Sporting Clube de Braga Portugal, António Salvador da Costa.

Tuir nia, maske João Pedro bele ba maibé SLB la falta buat ida. Tanba, prinsípiu ida katak hahú hosi alin kiik sira ba leten. Ho ne’e maka to’o ohin loron SLB nunka kontratu jogadór estranjeiru.

“Ha’u hateten katak João Pedro ne’e bele ba maibé sei iha João Pedro barak. Ita boot sira sé asisti jogu entre SLB ho Cacusan CF iha semana kotuk, jogadór Natalino “Ameta” (36) ho idade foin tinan 15 maibé nia halo jogu ida ne’ebé maka furak teb-tebes. Tanba ne’e, SLB la sente falta buat ida ho João Pedro nia aujénsia”, haktuir.

Eis Sekretáriu Estadu Obras Públikus informa katak João Pedro nia prezensa iha Sporting Clube de Braga ne’e hanesan motivasaun ida ba jogadór timoroan sira tomak liuhusi Liga Futeból Amadora. Tanba ne’e, SLB hakarak agradese ba Prezidenti LFA, Nilton Gusmão Santos no Federasaun Futebol Timor-Leste tanba João Pedro mai hosi Sentru Juvenil.

Nia esplika, SLB sei la husu folin ba Sporting Clube de Braga tanba iha klaúsula ida hateten katak João Pedro ba halo estájiu tinan ida no kuandu progresu di’ak, nia sei kontinua. Hosi ida ne’e maka SLB sei haree ba kontratu fiksu ida nune’e bele benefísia SLB rasik.

“Maibé ami lakohi difikulta ami nia jogadór ne’e. Prezidenti SLB, Kay-Rala Xanana Gusmão hateten katak lalika difikulta prosesu ida ne’e nune’e bele halo estájiu”, katak tan.

Nia esplika katak João Pedro nia estatutu kontinua hanesan jogadór SLB no bainhira faze estájiu ne’e ramata sei fila hikas hamutuk ho SLB tanba kontratu ba João Pedro la’o hela.

Jornalista: Xisto Freitas

Editora: Rita Almeida

HUSIK IDA HATÁN