Siénsia-Matemátika Importante ba Dezenvolvimentu

0
81
Autoridade Ministériu Edukasaun tuur hamutuk ho diretór KOICA Hyeong Cheol Kang, reprezentante UNESCO iha Timor-Leste, Maria Ângela Sarmento no Diretór UNESCO, Jakarta, Shabaz Kahn iha lansamentu laboratóriu siénsia. Foto Tatoli: Rafy Belo

DILI, (TATOLI) – Siénsia no matemátika nu’udar fatór importante ba dezenvolvimentu, tanba ne’e governu liuhosi Ministériu Edukasaun kontinua halo esforsu hodi kapasita profesór siénsia no matemátika sira.

“Promove siénsia no matemátika nu’udar buat ne’ebé interesante, relevante asesivel no komprensível ba alunu sira iha nível hothotu bele komprende liuhusi maneira oioin”, hateten Vise-ministra I, Dulce de Jesus iha nia intervensaun lansamentu ofisiál ba laboratóriu siénsia iha Eskola Báziku Sentrál, 30 Agostu, Komoro, sesta (21/4).

“Maneira ida mak aumenta profesór no aumenta estudante sira-nia asesu ba laboratóriu”, hatutan tan. Siénsia no matemátika fatór ida importante tebes ba dezenvolvimentu.

“Planu V no VI governu nian tau edukasaun matemátika no siénsia nian iha eskola sira nu’udar prioridade boot”, tenik.

Diretór UNESCO (United Nation Education, Scentific and Culture Organization), Shabaz Kahn hateten timoroan sira moris iha ambiente ida ne’ebé konsidera nu’udar laboratóriu moris ida.

“Ko’alia kona-ba siénsia naturais, timoroan sira bele haree, aprende iha nia moris lorloron”, akresenta. Ita iha ligasaun ba malu entre bee, aihoris, ambiente no ema.

“Ita sei aprende ho lais bainhira ita lori ita-nia aan aprende mós iha li’ur liga ho natureza, ho ambiente ne’ebé ita moris ho lorloron”, hateten.

Kahn reforsa Timor-Leste iha diversidade siénsia ne’ebé presiza dezenvolve no promove. “Imi iha prosesu aprende siénsia, espera loron ruma bele hetan estudante sientisita di’ak iha futuru”, konklui.

Jornalista: Rafy Belo

Editora: Rita Almeida

HUSIK IDA HATÁN