Semana Oin mak Iha Desizaun ba Membru Konsellu UNTL

0
102
Xefe Governu, Rui Maria de Araùjo preside enkontru Konsellu Ministru, ohin iha Palàsiu Governu. Foto GPM

DILI, (TATOLI) – Reuniaun Konsellu Ministru (KM) ne’ebé hala’o iha Palásiu Governu, tersa (11/4), halo aprovasaun no aprezentasaun barak kona-ba atividade saida mak governu liuhusi ministériu sira sei halo inklui mós deliberasaun ba membru Konsellu Jerál Universidade Nasionál Timor Lorosa’e (UNTL) nian.

Maske nune’e, Vise-ministru Edukasaun I Asuntu Ensinu Sekundáriu no Superiór, Abel da Costa Ximenes Larisina informa ba Tatoli katak KM halo apresiasaun de’it tanba ne’e seidauk iha desizaun. “Semana oin mak sei iha desizaun”, hateten vise-ministru edukasaun I, Abel Ximenes.

Entretantu, reuniaun Konsellu ba loron ohin nian mak iha parte haat. Dahuluk, aprovasaun ajenda ba semana oin.

Daruak, aprezentasaun relatóriu investigasaun kona-ba peska ilegál husi Ministériu Agrikultura no Peska (MAP), aprezentasaun akordu kona-ba “Pro-Resilience Timor-Leste-Strentening resilience in comunities most affected by drougth” aprezenta husi MAP.

Tuir mai, aprezentasaun kona-ba akordu “Preparatory Assistence for the first Timor-Leste Agriculture Census (TLAC)” aprezenta mós husi ministériu ne’ebé hanesan.

Seluk mak aprezentasaun kona-ba akordu parseria sentru desportivu futebol amadór aprezenta husi Sekretáriu Estadu Juventude no Desportu (SEJD).

Datoluk, proposta rezolusaun kona-ba konvensaun internasionál ba salvaguarda vida umana no tasi 1974 (SOLAS) aprezenta husi Ministériu Obras Públika, Transporte no Komunikasaun (MOPTK).

Tuir mai, proposta rezolusaun kona-ba konvensaun internasionál ba prevensaun poluisaun husi náviu 1973 (MARPOL) aprezenta husi MOPTK no seluk mak proposta rezolusaun kona-ba konvensaun internasionál kona-ba padraun formasaun, sertifikasaun no servisu kuartu marítimu 1978 (STCW78) aprezenta mós husi ministériu ne’ebé hanesan.

Ikus liu, parte dahat nian mak kona-ba deliberasaun ba membru Konsellu Jerál UNTL nian aprezenta husi Ministériu Edukasaun (ME) nomós deliberasaun ba pedidu Prezidente Repúblika (PR) kona-ba estensaun  mandatu Prokuradór Jerál Repúblika (PJR) aprezenta husi Gabinete Primeiru-Ministru (GPM).

Jornalista: Rafy Belo

Editora: Rita Almeida

HUSIK IDA HATÁN