Selebra Loron ANZAC Parte Hosi Solidaridade-Respeitu

0
31
Momentu selebrasaun loron ANZAC iha Kristu Rei, segunda, (25/4). Foto Tatoli/Julia Chatarina

DILI, (TATOLI) – Ministru Estadu no Prezidénsia Konselhu Ministru (PCM), Agio Pereira hateten partisipa selebrasaun loron veteranu Austrália no Nova Zelándia (ANZAC) ohin dader iha Kristu Rei nu’udar asaun solidaridade no respeitu hosi Estadu Timor-Leste.

“Dader ida ne’e hanesan onrá ida ba ha’u, lori governu Timor-Leste nia naran, bele hamutuk iha fatin ne’e selebra loron ANZAC hodi hatudu solidaridade no respeitu”, tenik governante ne’e iha nia diskursu selebrasaun loron ANZAC.

Momentu ne’e importante atu refleta katak, konflitu pasadu husik ba kotuk hodi agradese ba dame ohin loron nian.

Hodi haktuir, operasaun INTERFET  (The Australian Defence Force Participation in the International Forces East Timor) iha 1999 no operasaun forsa australianu iha 2006 hodi kria dame hanesan kontribuisaun ne’ebé signifikante. “Ida ne’e mak ami hetan nu’udar ajuda ida hodi reduz konflitu no rekonstrui ambiente seguransa estável”, katak governante ne’e.

Austrália no Nova Zelándia nia forsa defeza sira husi INTERFET, involve mós iha esforsu estabilidade tinan 2006.

“Forsa defeza hirak ne’e fó ona kontribuisaun signifikante liuhosi treinamentu no suporta Nasaun Timor-Leste nia instituisaun seguransa”, realsa.

Selebrasaun loron ANZAC fó hanoin ba povu Austrália no Nova Zelandia refleta ba espíritu sakrifísiu erói sira nian.

Serimónia ne’e hetan partisipasaun hosi membru governu balun, veteranu timoroan, diplomata sira, forsa defeza TL , Austrália no Nova Zelandia no reprezentativu família konvidadu ­sira.

Entretantu, veteranu hosi TL ne’ebé lidera hosi Prezidente eleitu, Francisco Guterres Lú-Olo partisipa loron refere iha Austrália hodi dezenvolve relasaun ho komunidade veteranu iha ne’eba.

Tinan ida ne’e, hanesan aniversáriu dala 100 dezembarke forza ANZAC nian iha Gallipoli, durante funu mundial dahuluk.

Jornalista: Julia Chatarina

Editora: Rita Almeida

HUSIK IDA HATÁN