SEJD Aprezenta Parseria Sentru Desportivu Amadora

0
74
Leovigildo Hornay

DILI, (TATOLI) – Sekretáriu Estadu Juventude no Desportu (SEJD), Leovigildo Hornay aprezenta parseria ba sentru desportivu futeból Amadora ho kompañia sira oinsá mak halo parseria ho Governu ba preparasaun infraestrutra estádiu nasionál no munisipál sira  iha enkontru Konsellu Ministru, horisehik.

Aprezentasaun ne’e hetan apresiasaun di’ak husi Primeiru Ministru no membru Governu sira hodi husu ba SEJD atu diskute ho ekipa finansa husi Ministériu Finansa hodi haree ba finansiamentu.

Leovigildo hatete daudaun ne’e iha ekipa téknika ida tenke halo ezersísiu iha kolaborasaun ho Ministériu Finansa ho Ministériu Planeamentu no Investimentu Estratéjiku atu haree partisipasaun aprezentasaun ideia  para lori filafali ba KM husi pontudevista tékniku no probabilidade sira.

Sekretáriu Estadu ne’e afirma, Timor-Leste tenke dignifika nia-an, hatuur didi’ak infraestrutura ida para depois fó vantajen ba país ne’e atu sai hanesan uma-na’in ba desportu sira ho karater rejionál, internasionál no multi-rejionál hanesan jogu Comunidade dos Países da Língua Portuguesa (CPLP).

“Ita tenke prontu sai uma-na’in, entaun infraestrutura nu’udar rekezitu prinsipál ida atubele integra didi’ak. Sestu Governu tenke rai didi’ak polítika sira ne’e iha sistema para depois handover ba iha Governu foun mai ne’e, iha ona kondisaun no informasaun natoon para bele kontinua”, dehan.

Sobre finansiamentu ba konstrusaun estádiu nian, Leovigildo relata iha orientasaun KM nian sujere atu organiza didi’ak iha diskusaun temátika ho entidade sira tanba konsórsiu nasionál no internasionál Governu sei buka.

“Ha’u hatete mós tanba vontade hanesan emprezáriu nasionál timoroan hotu ne’ebé mak hakarak hamutuk hodi kolabora ho konsórsiu internasionál ka país sira dezenvolvidu para introdús took projetu ida ne’e iha ita-nia nasaun nu’udar pilotu ida depois ita bele projeta ba oin tan”, Leovigildo hakotu.

Jornalista: Maria Auxiliadora

Editora: Rita Almeida

HUSIK IDA HATÁN