Sarani Moris Di’ak Ona Hahú Dook Hosi Maromak

0
48
Selebrasaun misa Kinta-Feira Santa iha Igreja Katedral Dili,Kinta horsehik. Imajen Ajénsia TATOLI/Xisto Freitas

DILI, (TATOLI) – Bispu Dioseze Dili, Don Virgílio do Carmo subliña realidade ne’ebé ohin loron akontese iha mundu maka sarani sira iha tendénsia hadook án hosi Maromak tanba moris di’ak ona.

“Sarani barak buka la depende tan ba Maromak. Depende ba sira nia matenek, depende ba sira nia rikusoin, sira nia lulik no sira nia biru. Ne’e la’ós bensaun maibé malisan ida basá ita fila kotuk ba Maromak”, Don Virgílio hato’o kestaun ne’e liuhusi nia omília iha misa Kinta-Feira Santa ne’ebé hala’o iha Igreja Katedral Vilaverde, Kinta.

Líder Igreja Katólika esplika Maromak hakarak atu ninia povu (sarani) hosi jerasaun ba jerasaun fiar metin nafatin iha Maromak maske iha dezafiu oi-oin. Ida ne’ebé fiar metin iha Maromak, Bispu infirma, Maromak sei la husik moris mesak no sei simu bensaun.

“Hanesan uluk no agora, Maromak salva nia povu. Maromak nia domin ba nia povu ne’e nunka mihis”, hatutan.

Iha biban ne’e, atu refleta ba sintidu Kinta-Feira Santa ninian, Bispu Dioseze Dili haktuir katak meza maka eskola umanizasaun ida no meza nu’udar instrumentu komunikasaun hodi kria ambiente ida familiár.

Nia dehan iha meza maka Jesus halibur ninia eskolante sira hodi han hamutuk no harii Instituisaun Eukaristia. Liuhusi kriasaun Instituisaun Eukaristia maka Jesus fase apostulu sira nia ain.

“Hosi meza maka Jesus husik lisaun ida ne’ebé to’o ohin loron hakerek metin iha ita nia fuan maka domin. Meza maka eskola domin nian. Imi sei hadomi malu hanesan ha’u hadomi imi”, Don Virgílio relembra Jesus ninia memória ba sarani sira.

Nia tenik hadulas meza maka domin sei sai boot no meza maka fatin ezerse ita nia fiar ne’ebé moris. “Importante liu maka familia, komunidade no nasaun sai instrumentu unidade no domin. Tanba ne’e maka Kinta Feira Santa nu’udar selebrasaun domin nian. Tanba domin maka Jesus sai mai iha ita nia isin no ran nu’udar aihan moris nian”, Bispu esklarese.

Misa Kinta-Feira Santa hala’o iha tuku 18 to’o 20, partisipa hosi sarani rihun ba rihun. Iha misa refere, Bispu fase apostulu sira nia ain nu’udar símblu unidade no domin ne’ebé Jesus hanorin ba sarani sira molok ema a’at sira hedi nia ba kruz.

Jornalista: Xisto Freitas

Editora: Rita Almeida

 

HUSIK IDA HATÁN