Reforma Fiskál Sei Atinje Reseita Doméstika

0
47
Vise Ministru Finansas, Helder da Costa, deputadu Francisco Miranda Branco no Organizasaun Naun Govermentais, Mericio Akara halo debate ba programa Talk Show hosi SEKOMS ne'ebé sei fó sai hosi RTTL. Foto bankada FRETILIN

DILI, (TATOLI) – Reforma Fiskál ne’ebé mai husi inisiativa Governu Konstitusionál da-limak no realizasaun iha Governu Konstitusionál da-neen, halo reforma ba área polítika, enkuadramentu legál no administrasaun ho objetivu atu atinje reseita doméstika porsentu 15 ba totál ekonomia iha tinan 2020.

Inisiativa Governasaun da-limak nian tanba identifika Nasaun nia dependénsia husi reseita minarai maka’as, nune’e buka meiu atu aumenta kolesaun reseita doméstika hodi redús dependénsia ne’e.

Realizasaun sestu Governu ne’e estabelese Komisaun Reforma Fiskál (KRF) iha Ministériu Finansa, servisu hamutuk ho entidade hodi halo reforma.

“Liga ba reforma iha área polítika, papél reforma mak aumenta kolesaun reseita doméstika ne’ebé ita-nia Estadu halo, alvu ne’ebé ita trasa ona ba 2020, ita-nia reseita doméstika sa’e ba porsentu 15 husi totál ekonomia ne’ebé iha”, hatete Vise-Ministru Finansa, Helder Lopes iha Muzeu Rezisténsia, ohin.

Papél ida ne’ebé KRF tenke halo mak oinsá asegura efisiénsia iha despeza públika nian tanba ne’e mak iha termu polítiku iha objetivu rua mak oinsá atu aumenta kolesaun reseita ba Estadu no kontinua hadi’a despeza públika nian, nune’e la’o di’ak liután.

Reforma iha área enkuadramentu legál haree ba lei sira ne’ebé asosiadu ho objetívu polítika rua, nune’e bele sai enkuadramentu legál hodi suporta no alkansa objetivu.

“Reforma Fiskál hadi’a ona lei tributária ba Timor-Leste, halo ona lei sobre lei IVA (Impostu Valór Akresentadu), lei sira ne’e prontu ona, só Governu hanoin katak hein uitoan lai, bainhira finaliza ona foin aprezenta iha Konsellu Ministru, lei ida ne’e tenke lori ba Parlamentu Nasionál”.

Husi parte despeza nia sei haree lei orsamentu jestaun finansa públika para hadi’a lei ne’e ho di’ak liután hodi suporta efisiénsia despeza públika.

Reforma parte administrasaun, daudaun ne’e foku ba kapasita administrasaun tributária no finanseira hodi taka lakuna sira ne’ebé daudaun ne’e akontese, nune’e efisiénsia ba kolesaun reseita tanba administrasaun importante hodi kolleta reseita.

“Ita bele halo polítika no lei ho di’ak, maibé adminsitrasaun ka mákina mak laiha kapasidade dalaruma latinje ita-nia objetivu. Tanba ne’e mak Governu aprova ona orgánika ba autoridade alfándega no impostu, sira sei sai autoridade ida ne’ebé  autónomu para jere sira-nia orsamentu rasik atu halo jestaun iha nivel diresaun jerál hodi halo kolesaun di’ak liután ba ita-nia reseita”, katak Vise-Ministru.

Parte reforma administrasaun nian sei haree mós sistema ne’ebé utiliza iha alfándega no impostu bainhira kolleta dadus uza ho di’ak para taka lakuna ne’ebé iha bainhira ema sira halo kolesaun reseita.

Reforma Fiskál halo reforma iha área tolu, espera katak alvu hodi atinje reseita doméstika porsentu 15 ba totál ekonomia iha 2020.

Jornalista: Maria Auxiliadora

Editora: Rita Almeida

HUSIK IDA HATÁN