PR Taur Defende Dezenvolvimentu Sosiuekonómiku

0
53
Prezidente Repúblika, Taur Matan Ruak bainhira halo vizita ba área rurais hodi rona preokupasaun povu. Foto mídia prezidensiál

DILI, (TATOLI) – Prezidenti Repúblika (PR), Taur Matan Ruak hakarak dezenvolvimentu sosioekonómiku ne’ebé di’ak no promove kondisaun moris ba ema hotu-hotu.

Xefe Estadu hato’o kestaun ne’e liuhusi ninia mensajen ofisiál ba Parlamentu Nasionál, tersa (25/4) relasiona ho lei oi-oin ne’ebé promulga ona hanesan Dekretu Parlamentu Nasionál númeru 35/III, lei pensaun ba eis titulár sira no alterasaun dahuluk ba lei númeru 5/2004, hosi loron 5 fulan-maiu kona-ba estatutu deputadu sira-nian inklui alterasaun dahuluk ba lei númeru 7/2007 hosi loron 25 fulan-jullu, kona-ba estatutu titulár Órgaun Soberania sira.

Lei pensaun vitalisia ne’ebé promulga ona, maibé nia kontinua duvida ho razaun benefísiu exesionál iha lei ne’e hanesan priviléjiu la justifikável ba klase polítika, tanba sidadaun barak sei moris iha mukit nia laran, hasoru deznutrisaun, la asesu ba bee-hemu ka meius subsisténsia ne’ebé mínimu.

“Atu promove kondisaun moris ne’ebé di’ak liután ba ita-nia sidadaun sira hanesan objetivu ida ita hotu nian, ne’ebé ita hotu haka’as-án atu asegura repartisaun ida ne’ebé justu liu ba ita-nia rikusoin no enkargus (responsabilidade) Estadu nian, nune’e kumpre prinsípiu Estadu Direitu Demokrátiku nu’udar hatuur iha Konstituisaun artigu 1”, eis komandante gerileiru ne’e esplika liuhosi nota komunikadu ne’ebé Tatoli asesu.

Nia afirma, presiza haree oinsá fahe rikusoin hodi define prioridade, fó atensaun ba sidadaun sira ne’ebé terus no mukit; taxa natalidade ne’ebé aas ezije Estadu investe maka’as liu-tan iha edukasaun, liuliu ensinu pre-eskolár no báziku; kondisaun sanitasaun ne’ebé ladún di’ak ezije Estadu investe maka’as liután iha infraestrutura báziku hirak hanesan saneamentu no bee-hemu.

Taur rekuñese katak foin lailais ne’e Parlamentu Nasionál aprova lei lubuk ida kona-ba protesaun sosiál, ne’ebé konsidera hanesan insersaun (aktu) sistemátika ne’ebé loos ba reforma lejizlativa hirak-ne’e, hodi asegura kondisaun igualdade ba sidadaun nasionál seluseluk tuir haruka iha art. 16 Konstituisaun nian.

“Ha’u hein katak ida-ne’e hanesan hakat ida atu halakon “pensaun vitalísia” ba titulár kargu polítiku sira no atu harii kondisaun hirak ne’ebé justu liu ba repartisaun rikusoin no enkargus Estadu nian”, realsa.

Jornalista: Xisto Freitas

Editora: Rita Almeida

HUSIK IDA HATÁN