PN-Sosiedade Sivíl Apresia Polítika Reforma Fiskál

0
43
Vise Ministru Finansas, Helder da Costa, deputadu Francisco Miranda Branco no Organizasaun Naun Govermentais, Mericio Akara halo debate ba programa Talk Show hosi SEKOMS ne'ebé sei fó sai hosi RTTL. Foto bankada FRETILIN

DILI, (TATOLI) – Parlamentu Nasionál (PN)  no Sosiedade Sivíl apresia no apoia polítika reforma fiskál ne’ebé Governu inisia, parte ida halo mudansa ba dependensia iha fundu minarai.

Observasaun ne’ebé parte sosiedade sivíl halo kuaze porsentu 90 to’o 95 fonte Orsamentu Jerál Estadu (OJE) mai husi petrolíferu, ne’e risku ba ezisténsia fundu tanba daudaun ne’e folin mina globál laklaru, rendimetu ki’ik no produsaun Kitan laprodús ona tanba rezerva ki’ik no Bayu Undan nia produsaun hahú menus.

“Agora, loron ida ita bele prodús de’it 30 mil to’o 40 barríl, kompara ho uluk to’o 90.000 to’o 100.000 loron ida prodús no fa’an, no agora fó rendimentu ki’ik”, katak Direitór Ezekutivu Organizasaun Naun Govermentais Luta Hamutuk, Mericio Akara iha Muzeu Rezisténsia, ohin.

Nia hatutan: “Tendénsia nesesidade atu uza osan fundu minarai halo dezenvolvimentu ne’e sa’e maka’as no ita-nia povu no nasaun presiza bee-moos, estrada rurál entaun tendénsia foti osan mós maka’as”.

Husi kontestu sosiedade sivíl nian katak ameasa ba ezisténsia fundu se ladixiplina iha tinan 15 mai sei iha problema.

“Bainhira Governu hahú planu halo reforma fiskál no ekonomia, ami apresia no kontente tanba ne’e mak ami hakarak kompara para to’o hetan nia rezultadu”, dehan.

Ba reforma fiskál atu hasa’e reseita doméstika, mínimu hasa’e ba porsentu 10 no di’ak liu sei to’o porsentu 15 maski ne’e nu’udar ambisaun boot liu maibé kuandu hetan to’o iha ne’ebá bele taka ba despeza saláriu no vensimentu no pensaun ne’ebé labele ona foti osan husi fundu minarai bainhira reseita doméstika sa’e.

Diretór Luta Hamutuk ne’e relata bainhira halo sorumutuk ho ekipa refoma fiskál pozitivu katak sei to’o iha 2020 Estadu bele kolleta U$450 milloens no sufisiente atu selu saláriu no pensaun hodi hamenus ona dependénsia ba reseita petrolíferu.

Entretantu deputadu hosi bankada FRETILIN, Francisco Branco apoiu reforma fiskál ne’ebé mai husi inisiativa V Governu importante tebes tanba Timor-Leste dependente totál ba fundu minarai.

“Apoia polítika Estadu nian no parlamentu laiha objesaun no fó prioridade ba polítika ida ne’e”, katak. 

Jornalista: Maria Auxiliadora

Editora: Rita Almeida

HUSIK IDA HATÁN