PM Husu MS Revee Programa Imunizasaun

0
34
Foto google

DILI, (TATOLI) – Primeiru Ministru (PM), Rui Maria de Araújo husu ba Ministériu Saúde (MS) atu haree hikas (revee) programa imunizasaun hodi fó vasina ba labarik no inan isin rua.

Pedidu ne’e hato’o iha selebrasaun imunizasaun mundiál iha sentru saúde Bekora, postu administrativu Kristro Rei, munisípiu Dili, segunda (24/4).

“Ministériu saúde no diretór sira halo favór revee programa vasina iha Timor laran tomakʺ, sujere Xefe Governu.

Sujestasaun ne’e bazeia ba ninia observasaun no nota katak programa vasina la’o ladun di’ak. ʺHa’u ba vizita sentru no postu saúde balun, ha’u husu ohin vasina ema nain hira, respota hosi médiku sira katak ohin laiha orariu vasinasaun, tanba ne’e ita tenke revee hodi fó vasinasaun ba labarik sira lor-loron”, katak.

A’at liu, medikú sira la fó vasinasaun bainhira komunidade  la’o dok atu hetan vasinasaun. Tanba ne’e husu atu hadi’a sistema atendementu iha tinan ne’e hodi visita komunidade no suku hodi fó vasinasaun.

Vasinasaun atu protege labarik sira husi moras oin oin hanesan tuberculose-TBC, pertusis (isin manas akompaña ho mear), difteria (moras fuan no rins), isin manas no seluk tan.

Tanba ne’e, labarik ida tenke hetan vasina dala lima molok atinje tinan ida, vasina dala ida iha tinan ida ho balun no ikus liu iha tinan neen.

Vise Ministra Saúde Ana Isabel Soares hateten, tuir dadus iha 2015  atinje pursentu 64 no pursentu 71 iha 2016.

“Ami fó hanoin tan ba ita ninia profesionál saúde sira atu fahe no sensibiliza nafatin importansia hosi vasinasaun kompletu ba ita ninia komunidade siraʺ, dehan tan.

Jornalista: Agapito dos Santos

Editora: Rita Almeida

HUSIK IDA HATÁN