DILI (TATOLI) – Vise-Ministru Obras Públika, Telekomunikasaun no Komunikasaun I (MOPTK), Januário Pereira hateten, Polítika Abastesimentu Bee no Jestaun Rekursu Ídriku ne’ebé semana kotuk aprezenta iha konsellu ministru presiza hadia fali tamba liga ho ministériu barak.
“Tenke hadia fali tanba liga ho ministériu barak hanesan MAP, MKIA no seluk tan, tamba ne’e mak iha hanoin ida atu oinsa ministériu hirak ne’e bele fó mós kontribuisaun” tenik ba Agencia TATOLI iha nia k’nar fatin, Segunda (03/04/2017).
Hodi hatutan, hakarak hare’e substánsia katak, polítika hirak ne’e bele sai matadalan ida ba ezekutór sira iha abang bain rua tamba mundu rasik ohin loron prokupa ho bee ne’ebé hanesan nesesidade báziku ba ema hotu iha ita nia rai no fatin seluk.
Nia haktuir, tinan 2015 hafoin halo avaliasaun konaba resultadu objektivu dezenvolvimentu mileniu nian, lansa mós objektivu dezenvolvimentu sustentável (ODS) ne’ebé realsa makas liutan konaba bee mos. Hahu tinan 2011 setembru, iha planu stratéjiku dezenvolvimentu (PED) ne’ebé kuaze atu hanesan ho pontus sira ne’ebé ko’alia iha ODS. ODS no PED sei remata iha tinan 2030.
Hodi dehan tan, tinan-tinan tau osan hira para bele atinji objektivu hirak ne’ebé realsa iha ODS no PED. “Programa ne’e atu la’o tenke hatur polítika ida ita rekonhese katak polítika ne’ebé hatur iha PED klaru tebes”.
Iha ODS ne’ebé hatudu klaru objektivu 17 atu transforma ita nia mundu, ne’ebé sita objektivu númeru 6 kulia konaba bee-moos no saneamentu katak garante disponibilidade no jestaun sustentável ba bee-moos no saneamentu ba ema hotu.
Jornalista: Julia Chatarina
Editor: Gantry Meilana
