Pastorál Caisido Apela Foinsa’e Labele Kaben Sedu

0
96
Kapela São Francisco de Assis, Kaisidu. Foto espesiál

BAUCAU, (TATOLI) – Responsável Sentru Pastorál Caisido apela ba foinsa’e atu labele kaben sedu maibé oinsá utiliza oportunidade atu hadi’a vida moris iha família no sosiedade.

“Ba foinsa’e mane sira, idade 25 ba leten mak bele harii uma kain. Ba feto sira mínimu tinan 20”, hateten responsável Sentru Pastorál Caisido, Manuel Azevedo iha kapela São Francisco de Assis Caisido, suku Tirilolo, munisípiu Baucau, Domingu (16/4).

Responsável ne’e husu ba foinsa’e atu manten fiar no prinsípiu katak bainhira otas sei nurak keta foti desizaun sedu hodi harii uma kain.

“Prepara didi’ak imi-nia aan. Nune’e bainhira harii ona uma kain maske iha difikuldade maibé imi preparadu hodi hasoru”, enkoraja.

Autoridade relijioza ho komunidade husu ba sarani atu kontinua valoriza no manten identidade timoroan nian liuhusi hatais. “Rona no halo tuir ita-nia kultura, ita sei hetan moris di’ak no dignu iha kreda, família nomós Nasaun”, tenik responsável.

Globalizasaun, keta haluha valoriza nafatin lisan tanba hanesan rikeza kulturál ne’ebé presiza kontinua prezerva.

“Tenta kuidadu nafatin aktu estranjeiru ne’ebé bele mai influénsia ita-nia orijinalidade. Keta haluha katak ita-nia orijen ne’e mak reprezenta ita-nia identidade loloos”, apela.

Konklui, kuidadu aan nu’udar obra Maromak nian, kuidadu identidade nu’udar patrimóniu povu no Nasaun.

Jornalista: Rafy Belo

Editora: Rita Almeida

HUSIK IDA HATÁN