Partisipa Loron ANZAC Hanesan Onra ba Veteranu

0
67
Veteranu Timor-Leste bainhira partisipa loron ANZAC iha Austrália, 25 abril 2017. Imajen mídia Prezidente Repúblika eleitu.

DILI, (TATOLI) – Prezidente Repúblika eleitu, Francisco Guterres Lú-Olo hatete ninia parte sente onra boot bainhira partisipa serimonia tinan veteranu Austrália (ANZAC) ba-dala 100 iha Austrália, 25 abril foin lalais ne’e.

“Ha’u haree katak veteranu Timor-Leste nian partisipa iha loron importante ne’e hanesan onra boot tanba liuhusi seremónia ne’e veteranu sira rai rua nian hametin di’ak liu-tan sira nia relasaun ba futuru”, dehan Lú-Olo liuhusi mídia Prezidente eleitu ne’ebé TATOLI asesu sesta ne’e.

Hanesan veteranu, hein katak bainhira veteranu organiza di’ak liu maka belun viziñu sei apoia iha projetu saida de’it hodi lori veteranus Timor moris iha dignidade.

Bainhira bandeira nasionál hola parte marsa iha momentu importante ne’e, hetan apresiasaun hosi veteranu, autoridade no komunidade viziñu ne’ebé hola parte.

Apresiasaun ne’e, tuir Xefe Estadu eleitu katak funu nain parte rua iha sentimentu hanesan bainhira sakrifika-án ba luta.

“Tanba sira haree katak veteranu Timor-Leste iha luta ne’ebé maka naruk durante tinan 24 hodi hetan ninia liberdade no independénsia, hanesan mós Austrália ne’ebé maka luta iha fatin barak, to’o Europa, Áfrika no Médiu Oriente hodi luta no mate barak tanba defende justisa ba soberania nasionál”, haktuir.

Hatutan: “Buat hirak ne’e hotu maka halo sentimentu hosi veteranu Timor-Leste no Austrália besik malu liu-tan”.

Iha loron ANZAC, Lú-Olo ho delegasaun partisipa seremónia tau aifunan ba monumentu eroi Austrália, misa no marsa parada.

Funu nain sira partisipa loron ne’e iha sidade tolu iha Austrália maka Brisbane, Tasmania no Camberra, ne’ebé lidera hosi Prezidenti eleitu, Lú-Olo.

Jornalista: Xisto Freitas

Editora: Rita Almeida

HUSIK IDA HATÁN