“Osan Estadu Tenke Gasta Tuir Regra”

0
114
Ministru Estadu Koordenadór Asuntu Ekonómiku (MEKAE) no Ministru Agrikultura no Peska (MAP), Estanislau Aleixo da Silva. Foto espesiál.

DILI, (TATOLI) – Ministru Estadu Koordenadór Asuntu Ekonómiku (MEKAE) no Ministru Agrikultura no Peska (MAP), Estanislau Aleixo da Silva hatete kréditu la’os atu foti osan no fó arbiru de’it.

“Osan Estadu tenke gasta tuir regra”, hatete Estanislau, horisehik iha Liceu. Hatutan, ministériu servisu iha liña orientasaun ne’ebé klara liu ho objetivu dezenvolve ekonomia rai-laran.

Programa apoiu espesífiku ba setór privadu, no sei estabelese garantia bankária atu habelar kréditu ne’ebé realiza ona reuniaun barak ho Kámara Komérsiu Indústria Timor-Leste no Banku Nasionál Komérsiu Timor-Leste (BNKTL) atu haree ba kestaun ne’e.

MEKAE fó apoia ba KKI-TL hodi fó formasaun no daudaun ne’e sei haree programa ida para harii área jestaun nian tanba sei iha frakeza barak nomós área kontabilidade.

“Gabinete koordenasaun hamutuk ho Ministériu Finansa asina protokolu ho KKI-TL para tuur hamutuk atu haree espesífikamente pontu frakeza iha ne’ebé, prioridade liu mak saida atu quebra ida ne’e”, haktenik.

Iha termu investimentu internasionál, MEKAE koopera mós ho ministériu sira seluk para konklui akordu investimentu ba TL Cement, Pelican Paradise ne’ebé pratikamente konkluidu, akordu parseria finanseira ho TL Cement mós konklui, lisensiamentu ba peska ne’ebé hahú ona, atu harii portu peska nian no estabelese sentru prosesamentu iha Laleia-Manatutu no sei asina invenstimentu ida kona-ba halo no hadi’a ró nomós Heineiken ne’ebé prodús ona serveza.

Hanesan parseiru dezenvolvimentu Governu nian, KKI-TL hanoin katak dependénsia ne’ebé durante ne’e setór privadu iha, independente liubá setór konstrusaun sivíl no hanoin oinsá atu halai filafali ba investimentu iha setór produtivu.

“Ida ne’e mak polítika Kámara Komérsiu nian, hamutuk ho Ministru Koordenadór tanba ita haree dependénsia empreza tomak iha territóriu to’o agora sei depende liubá projetu Governu. Seidauk hanoin halo oinsá mak aproveita lukru husi setór konstrusaun sivíl atubele investe filafali iha setór produtivu”, Vise Prezidente KKI-TL, João Alves hatete.

Timor-Leste nu’udar país ne’ebé dependente barak, kuaze kapitál moeda halai sai ba liur liuliu ba materiál importada.

KKI-TL hamutuk ho ministru koordenadór sira atu haree oinsá mak bele iha mapeamentu ida ba territóriu hotu hodi kria kondisaun para empreza sira bele halo investimentu iha setór produtivu, mezmu nia eskalaun ki’ik mas iha prioridade boot atu halo depedénsia ne’e iha redusaun ba tinan tolu oin mai, produsaun ne’ebé importa bele halo iha rai-laran.

KKI-TL mós halo ona akordu ho banku nasionál no estranjeiru atu fó treinamentu ba empreza sira atubele iha jestaun di’ak liu iha sistema kona-ba cash flow nian para kria kondisaun sustentavel iha mikro no pekena empreza ne’ebé eziste.

Jornalista: Maria Auxiliadora

Editora: Rita Almeida

HUSIK IDA HATÁN