DILI, (TATOLI) – Ohin to’o tuku 24.00, nu’udar loron ikus ba Prezidente Repúblika, Taur Matan Ruak atu dekreta loron eleisaun ne’ebé governu aprejenta, loron 8 fulan-jullu 2017.
Primeiru Ministru, Rui Maria de Araújo observa, kuandu Xefe Estadu mak la-dekreta loron ne’e sei hamosu ‘implikasaun’.
“Governu hato’o tiha ba Prezidente Repúblika kona-ba implikasaun hosi atrazu iha data eleisaun nia, se señor Prezidente la-dekreta ohin dia 19, signifika eleisaun lejislativu la-halo iha dia 8 de jullu”, Xefe Governu esplika ba TATOLI bainhira hasoru malu iha Comité Centrál FRETILIN Komoro, kuarta (19/4).
Tuir lei hatete eleisaun parlamentár tenke akontese hosi loron ne’ebé Prezidenti dekreta to’o loron 80, se la-dekreta iha ohin, implikasaun direta ida mak formasaun governu foun, formasaun parlamentu no aprejentasaun programa governu foun inklui planu orsamentu retifikativu no preparasaun planu orsamentu 2018.
Lei orsamentu Estadu hatete, verba tinan oin tenke tama ba Parlamentu Nasionál loron 15 fulan-outubru.
Ho nune’e bainhira eleisaun atraza, signifika tomada pose governu foun mós sei atraza tanba ne’e automatikamente orsamentu foun mós iha problema tanba kontra ona regras orsamental.
Bainhira Xefe Estadu sesante la-dekreta data eleisaun iha loron ohin (kuarta, 19/4) to’o tuku 24.00. Lei eleisaun parlamentár anterior validu nafatin, maibé loron eleisaun ne’e tenke dekreta.
Jornalista: Manuel Pinto
Editora: Rita Almeida
