MS : Kompeténsia INS mak Hakbi’it Profisionál Saúde

0
28
Atividade balun hosi INS. Foto dokumentasaun INS

DILI, (TATOLI) – Governu liuhosi Ministériu Saúde hateten Institutu Nasionál Saúde (INS) importante hodi hakbi’it kompeténsia profisionál saúde hodi fornese asisténsia saúde ho kualidade ba ema hotu.

Mensajen hosi Ministra Saúde, Maria do Ceú Sarmento Pina ne’ebé lé hosi Diretór Ezekutivu INS, António Bonito ba Ajénsia Tatoli iha Institutu Siénsia Saúde Malinamuk Komoro, kinta (27/4) kona-ba espíritu kooperasaun entre parseiru dezenvolvimentu iha área saúde hodi fó biban atu profesionaliza profisionál saúde liuhosi formasaun.

“INS presiza prepara didiak hodi sai instituisaun formasaun saúde ne’ebé akreditadu hodi fornese formasaun saúde ho kualidade ba profisionál saúde hodi hasa’e kompeténsia klínika ho di’ak”, hatutan.

Kompromisu Governu ba programa prioridade atu hadi’a kapasidade jestaun, administrasaun no implementasaun servisu saúde.

Planu estratéjiku INS 2015 to’o 2019 hatur ona ho objetivu estratéjiku neen no prioridade 13 hodi rekomenda ba lideransa INS no parseiru hotu atu utiliza hanesan referénsia hodi dezenvolve ida-ida nia planu asaun anuál.

Programa ne’e bele alkansa ho objetivu hodi hamosu kompromisu, hametin espíritu kooperasaun INS 2017, kompriende kona-ba susesu, dezafiu iha implementasaun matrís kooperasaun 2016 no bele dezenvolve fali kooperasaun iha 2017

Dezenvolve no implementa planu anuál konjuntu ho di’ak hodi hakbi’it INS iha kualidade formasaun no kapasidade institusionál.

Entretantu, Diretór Bonito iha nia intervensaun katak programa workshop ho objetivu atu hametin forsa kolaborasaun entre INS ho parseiru sira atu fahe informasaun jerál kona-ba implementasaun atividade, mudansa iha mandatu, prioridade INS iha 2017, avalia implementasaun matrís 2016 ho nia susesu no dezafiu sira.

Hosi rezultadu ba programa ne’e, hein katak ho kompromisu entre INS ho parseiru sira sei hetan informasaun klaru ba progresu, susesu no dezafiu ba implementasaun programa.

INS agradese ba parseiru dezenvolvimentu iha setór saúde ne’ebé suporta formasaun  durante ne’e hodi kapasita no dezenvolve instituisaun sai forsa iha organizasaun institusionál no rekursu úmanu.

Enkuantu iha mos fallansu sira durante implementasaun programa ne’ebé impede servisu parseiru liu-liu relatóriu konta responsabilidade no implementasaun atividade formasaun ne’ebé atraza no la tuir tempu ne’ebé determinadu.

Programa workshop hetan partisipasaun hosi Mission Director of USAID iha TL, Diana B. Putman, reprejentante Organizasaun Mundiál ba Saúde iha Timor-Leste, Rajesh Pandav, reprejentante Organizasaun Nasoens Unidas ba Direitu Labarik, Fundu Nasoens Unidas nian ba Populasaun (UNFPA), Organizasaun Naun Govermentál no parseiru sira seluk.

Jornalistsa: Zezito Silva

Editora: Rita Almeida

HUSIK IDA HATÁN