MS Halo Inspesaun ba Farmasia Privada

0
67
Logo ministeriu saude

DILI, (TATOLI) – Ministériu Saúde (MS) liuhosi Inspesaun Jerál Saúde (IJS) halo inspesaun farmasia privada ne’ebé identifika irregularidade hosi farmasia Kura Hao, Xue Lai Shu no klínika Bailling.

Ekipa IJS identifika Farmasia Kura Hao seidauk iha dokumentu importasaun, aimoruk iha farmasia ladauk rejistu iha MS, aimoruk liu prazu iha item 10, naran aimoruk maioria sei hakerek ho lian Xineza.

Entretantu, klínika Xue Lai Shu ladauk iha lisensa operasionál hosi MS inklui klínika Bailling ne’ebé faan aimoruk liu prazu, aimoruk ne’ebé rejistadu iha MS hamutuk lima maibé realmente klínika faan fali aimoruk ho kuantidade 50.

Liuhosi komunikadu imprensa ne’ebé ajénsia Notisia Tatoli asesu, Inspetór Saúde, Natalino de Araujo esplika, farmasia Kura Hao tenke ba rejistu aimoruk iha MS ba item ida ho valór osan $100, aimoruk maioria sei hakerek lian Xineza maibé tuir lei katak aimoruk hotu tenke hakerek ho lian ofisiál no tranzitoriamente ho lian Inglesh no Indonézia, inklui Klínika Xue Lai Shu ladauk iha lisensa operasionál entaun haruka taka provizóriu hodi hein dokumentu legál hafoin loke fila fali.

“Farmasia no klínika privada sira atu kompleta dokumentu, nune’e labele prejudika atividade sira no pasiente sira ba konsulta ka sosa aimoruk tenke haree prazu validade aimoruk nian”, Inspetór Saúde husu

Hosi irregularidade hirak ne’e, ministériu saúde sei fó notifikasaun ka sansaun ou koimas no ikus liu sei taka totalmete atividade ba farmasia ka klínika sira ne’ebé kontra regulamentu tuir dekretu lei ne’ebé mak estabelese iha Nasaun.

Bazeia dekretu Lei númeru 12/2004 atu haree aimoruk ne’ebé liu prazu, tenke rejistu importasaun aimoruk, presiza justifika produtu  aimoruk, tenke iha dokumentu legál, rejistu medikamentu iha MS.

Kompañia KURA HAO Li Siom Nheu rekoñese, aimoruk sira ne’e mai husi Xina ho naran orijinál Xina no promete sei kompleta dokumentu ne’ebé presiza husi ministériu saúde no prontu atu simu notifikasaun ka sansaun ruma.

Jornalista: Zezito Silva

Editora: Rita Almeida

HUSIK IDA HATÁN