Lori Transporte Estadu Sein Autorizasaun Sei Tama Sela

0
77
Illustrasi Tatoli
KAK sei aplika sansaun detensaun ho oras 72 ba servidor publiku ne’ebe lori transporte estadu sein autorizasaun. Photo: TATOLI / Egas Cristovao

DÍLI (TATOLI) — Komisaun Anti Korupasaun (KAK) sei aplika detensaun durante oras 72 iha sela KAK nian wainhira hetan servidor publiku sira lori transporte estadu (kareta no motor) sein (laiha) autorizasaun.

KAK alerta kestaun ne’e wainhira halo seminariu kona ba korrupsaun no governasaun diak iha ba funsionáriu no estrutura Sekretáriu Estadu Muller (SEM), iha Salaun Maria Gorete, Obrigado Barrack, Caicoli-Díli, Kinta (06/04/2017).

Adjuntu área prevensaun, Rui Pereira dos Santos alerta ba servidór públiku sira atu labele lori motor no kareta estadu sein autorizasaun tanba bainhira KAK halo lansamentu ba nia sela, sei halo detensaun 72 oras molok prosesu seluk la’o.

KAK sei aplika sansaun detensaun ho oras 72 ba servidor publiku ne’ebe lori transporte estadu, tantu kareta no motor sein autorizasaun. Photo: TATOLI / Egas Cristovao

“Molok ami implementa, aproveita hasoru malu hanesan ne’e, ami aviza hela, atu la’o ba, se la iha nesesidade urjente, di’ak liu evita, iha uma. Keta lori motor kareta estadu la’o tuun, la’o sa’e,” apela Adjuntu Rui Pereira dos Santos.

Bainhira lori kareta no motor estadu la’o tuun sa’e, KAK hamutuk ho Transporte Terestre, património estadu hetan, sei kaptura no lori ba halo detensaun iha sela KAK nian.

“Uluk hetan, funsionáriu lori kareta no motor estadu nian selu de’it multa no bele ba ona, maibé bainhira KAK lansa ona nia sela, se hetan, KAK sei kaptura no lori uluk nia ba sela durante oras 72 nia laran molok prosesu seluk la’o,” nia informa.

Adjuntu área prevensaun, Rui Pereira dos Santos informa bainhira sela KAK nian ne’e halo lansamentu, sira sei konvida autoridade relevante sira hodi haree no akompaña.

“Ne’e hanesan entermu psikolojikamente, ne’e para ita sai ba akumula maluk sira, ita iha  sábadu no domingu, se la iha nesesidade di’ak liu labele uza tanba despeza ba kareta no motor sira ne’e, uza la tuir dalan ne’e boot tebes,” nia fó atensaun.

Prosesu ne’ebé sei aplika ba servidór estadu no governu hafoin detensaun 72 oras iha sela KAK nian prosesu sumáriu katak kontra artigu rua pekulatu nian.

Artigu 295o (Pekulatu) katak funsionáriu ne’ebé la ho lejitimidade (la tuir lei) foti ba nia di’ak rasik ka ema seluk, osan ka sasan movel, públiku ka partikulár ne’ebé entrega ba nia,  iha nia liman ka nia bele hetan asesu ba tanba ninia funsaun sira. Ne’e kondena ho kastigu tinan tolu to’o tinan sanulu.

Artigu 296o (Pekulatu uzu) katak funsionáriu ida ne’ebé uza ka husik ema seluk ho finalidade hirak ne’ebé la loloos, kareta sira ka movel sira ne’ebé ho valór boot (signifikativu), ne’ebé entrega ona ba nia, iha ninia liman ka nia bele hetan asesu ba sasan hirak ne’e tanba ninian funsaun sira. Ne’e kondena ho kastigu tinan rua, kuandu sasan hirak ne’e sei iha nia liman.

Jornalista: Rafy Belo / Editor: Gantry Meilana

 

 

 

HUSIK IDA HATÁN