Lideransa Mak Xavi Prevene Konflitu

0
82
Lideransa timoroan sira hasai foto hamutuk partisipante husi nasaun membru ARF (Asean Regional Forum) iha Hotel Novo Turizmu, Lecidere, Díli, kinta (19/04). Foto Tatoli: Rafy Belo

DILI, (TATOLI) – Eis Prezidente Repúblika, José Ramos Horta hateten prevensaun konflitu iha rejiaun no mundu iha Estadu frájil, fatór ida importante tebes mak lideransa.

“Lideransa ne’ebé di’ak, povu fiar, povu tuir. Lideransa ne’ebé iha vizaun di’ak, buka halo governasaun di’ak ne’ebé fó resposta di’ak ba povu nia mehi”, hateten diplomata senior, José Ramos Horta iha Hotel Novo Turizmu Lecidere, kinta (19/4).

Nia haklaken, la’ós povu nia mehi ne’ebé boot, tanba rai ne’e povu ne’e nunka mehi buat ne’ebé mak boot maibé mehi de’it atu haree oan bele ba eskola, saúde, mehi kabun nakonu, mehi dalaruma ba estrada. “Ne’e bolu espetativa povu nian”, tenik.

“Depois polítika ne’ebé haku’ak ema hotu”, nia hatutan. Tanba iha rai balun ne’ebé iha konflitu, ema ne’ebé iha poder mai husi grupu étniku ida la-simu ema seluk husi grupu étniku seluk.

Laureadu Nobel da Paz ne’e fó ezemplu katak hanesan Indonézia, ezemplu di’ak, grupu étniku barak tebes maibé Indonézia iha susesu boot iha nation building, harii sira-nia nasaun, sira-nia estadu.

Seluk mak India, rai ida ne’ebé mak boot tebes, grupu lubuk ida no iha língua oioin maibé sira konsege manten sira-nia unidade.

Tantu diplomasia preventiva hanesan prevensaun konflitu mak ida ne’e. “Ita bele iha susesu bainhira iha lideransa di’ak, lideransa ne’ebé iha vizaun di’ak, ezekuta programa ne’ebé ema hothotu simu”, konklui.

Jornalista: Rafy Belo

Editora: Rita Almeida

HUSIK IDA HATÁN