La’o Hamutuk Rekomenda STAE-CNE Hadi’a Frakeza

0
57
Logo Lao Hamutuk

DILI, (TATOLI) – Nu’udar observadór ba atividade eleitorál, Organizasaun Naun Govermentais (ONG), Lao Hamutuk rekomenda ba Sekretariadu Tékniku Administrasaun Eleitorál (STAE) ho Comissão Nacional de Eleições (CNE-Komisaun Nasionál ba Eleisaun) atu hadi’a frakeza ne’ebé akontese ona iha eleisaun prezidensiál atu di’ak liu iha festa demokrasia parlamentár.

Tuir komunikadu ne’ebé diriji mai Tatoli, kuarta (12/4), frakeza ne’ebé ONG ne’e sita mak falta kompriensaun kona-ba kompeténsia Prezidente Repúblika, tempu kampaña badak demais nomós falta diskursu kle’an kona-ba asuntu sira.

Falta ne’e, sujere atu reforsa liutan edukasaun votante ka edukasaun sívika ba sidadaun, nune’e ema bele senseblizadu ho importánsia husi eleisaun hodi hamenus númeru ema la vota no mós hasa’e kualidade eleisaun nian.

Sujestaun seluk mak haforsa komunikasaun ho kandidatu no ekipa susesu kada kandidatu sira nune’e, bele evita manipulasaun ka promesa ne’ebé la tuir kompeténsia prezidensiál ba populasaun. Fó tempu barak liu tán ba kampaña eleitorál hodi fó oportunidade ba kandidatu sira bele hato’o sira nia vizaun no misaun sira ho kle’an liu, no públiku hetan oportunidade nato’on atu halo klarifikasaun di’ak liu ba kandidatu sira.

Kria regulamentu ka mekanizmu ne’ebé bele fasilita votante sira, la presiza fila ba sira nia suku iha distritu atu vota. Polítika sira kona-ba eleisaun tenke halo fasil sidadaun sira atu hala’o sira nia direitu, la’ós sai fali obstákulu.

Mesmu nune’e, apresia ba progresu ne’ebé órgaun Estadu rua ne’e halo, liu-liu estabelese sentru votasaun iha Portugal no Austrália.

La’o Hamutuk mós rekomenda ba governu no órgaun eleitorál sira atu halo estudu apropriadu no aplika sistema fasil ba sidadaun iha ne’ebé de’it bele fó direitu.

Kontinua hasa’e kapasidade ba ofisiál sira ne’ebé kontrola no fasilita eleisaun, nune’e koñesimentu kle’an ba sistema kontajen votu no oinsá koordena lori kompriensaun ba fiskais no observadór sira kuandu mosu reklamasaun.

Ikus liu mak fó hanoin ba Komandu F-FDTL no PNTL atu evita deklarasaun sira ne’ebé la respeita direitu úumanu no liberdade ema nian.

Fiar  katak dalan di’ak liu hasoru asaun sira ne’ebé kontra lei maka prosesu justisa tuir lei ne’ebé iha, duke promove solusaun militaristiku.

Maske nune’e, La’o hamutuk hato’o parabéns ba PNTL (Polícia Nacional Timor-Leste) no F-FDTL (Falintil-Força Armada da Libertação Nacional de Timor-Leste) tan hala’o sira-nia servisu ho profesionalidade durante prosesu eleisaun prezidensiál.

Maibé, kongratula instituisaun Estadu sira, liu-liu STAE no CNE tan organiza ona eleisaun prezidensiál ba périodu 2017-2022 ho susesu.

Informasaun ne’e bele asesu mós iha link ne’e:http://www.laohamutuk.org/Justice/2017/PresElec/17PresElec.htm

Jornalista: Rafy Belo

Editora: Rita Almeida

HUSIK IDA HATÁN