Lansamentu Livru Destinu Turístiku Ho Pájina 877

0
57
Lansamentu Livru Destinu Turístiku Emergentes: Dezafiu no Oportunidade ho pájina 877 iha Paviliaun Sentru KOnvensaun Dili, Kinta (30/3). Foto mídia MTAK

DILI, (TATOLI) – Dili Instituisaun Teknolojia (DIT) hamutuk ho fakuldade ekonomia Universidade Algarve Portugal no Ministériu Turizmu, Arte no Kultura (MTAK) halo lansamentu livru Emerging Tourism Destination: Chalenges and Opportunities ho pájina 877 iha Paviliaun Sentru Konvensaun Dili, foin lalais ne’e.

Diretór Estudu Post Graduasaun DIT, João Cancio Freitas hateten livru ne’e kompila no tau hamutuk hosi komunikasaun sientífika sira ne’ebé halibur husi konferénsia internasionál kona-ba Destinu Turístiku Emergentes: Dezafiu no Oportunidade, ne’ebé hala’o iha 24 to’o 26 Outubru 2016 no frutu kooperasaun entre DIT, fakuldade ekonomia Universidade Algarve Portugal, no patrusíniu MTAK.

Ministru Francisco Kalbuady Lay (MTAK) no Ministru Estanislau da Silva (MEKAE) iha momentu abertura konferénsia internasionál no diskursu enseramentu ne’ebé hato’o husi Ministru Xanana Gusmão (MPIE), hafoin halibur komunikasaun sientífika no profesionál sira ne’ebé hato’o husi oradór prinsipal sira durante loron dahuluk konferénsia no palestrante, konvidadu sira.

Nia dehan, halibur komunikadu konferénsia husi oradór sira hamutuk 50 maibé balun la konsege remata tanba tempu no la públika, liuliu sira ne’ebé haruka mai maibé la aprezenta iha konferénsia ne’e.

“Komunikasaun sira ho karakter sientífika no profesionál ka balun ho karater prátiku, ami halo grupu iha komponente haat hanesan komunikasaun sira ne’ebé relasiona ho polítika no jestaun turístika emerjente, aventura no infrastrutura turístika, inovasaun dezenvolvimentu produtu tuístiku no merkadu, no grupu ikus liu kona-ba dezafíu no oportunidades turístiku”, informa.

Livru ho lian ingles ne’e públika husi center of appied research and policy studies DIT, no editór husi livru ne’e mak Diretór Estudu Post Graduasaun DIT, João Cancio Freitas , Reitór DIT Manuel Vong, Professor Júlio Mendes husi Departementu Turizmu fakuldade ekonomia, Universidade Algarve Portugal ne’ebé tinan kotuk nia sai hanesan professor vizitante iha DIT durante fulan 10 no momentu ne’eba servisu hamutuk, prepara konferénsia internasionál no prepara livru ne’e.

Nia dehan tan, hetan tulun husi ekipa téknika, liu-liu ekipa ICT nia husi DIT ne’ebé investe tempu hodi tulun no livru ne’e bele halo lansamentu.

Seremónia ida ne’e, reitór DIT entrega simbolikamente livru ba governu liuhosi MTAK no parseiru seluk ne’ebé hanesan konvidadu iha seremónia ne’e. Lansamentu ne’e iha versaun fízika nomós versaun elektrónika, hodi eskritór no pezkizadór sira iha rai seluk bele hetan asesu ba livru ida ne’e iha online.

Partisipante husi lansamentu ne’e mak Ministru MTAK, reitór DIT, reprezentante embaixada Portugal iha Timor-Leste ne’ebé reprezentas mós fakuldade ekonomia universidade Algarve Portugal, eis ministru balun, reitór husi universidade sira, diretór sira husi MTAK, setór privadu, no estudante sira husi DIT no bainaka seluk tan ne’ebé parseiru ho DIT no MTAK.

Jornalista: Julia Chatarina

Editora: Rita Almeida

HUSIK IDA HATÁN