Labarik Bele Serbisu, Maibé Labele Lakon Tempu Estudu

0
49
Sekretariadu Jerál KSTL, José Conçeicão da Costa. Foto TATOLI/Julia Chatarina

MANATUTU, (TATOLI) – Sekretáriu Jerál Konfederasaun Sindikatu Timor-Leste (KSTL), José Conçeicão da Costa hateten KSTL kombate traballadór infantil la-signifika labele serbisu, sira bele ajuda inan-aman maibé labele lakon estudu, tempu halimar no labele prejudika saúde, fíziku no mentál.

“Komisaun nasionál kontra traballu infantil, kompostu husi organizasaun 13 ne’ebé forma iha tinan 2014, governu 10, organizasaun empregadór rua  no sosiedade sivíl ida, remata ona planu esbosu asaun nasionál no oinsá atu kombate”, katak ba jornalista sira iha One Dolar Beach, kuarta (26/4) iha ámbitu kuda ai-oan atu komemora  loron mundiál traballadór sira.

Oras ne’e, Nasaun iha 160.000 resin traballadór infantil. TL iha 2009 ratifika ona konvensaun 188 ne’ebé hateten tenke halakon forma traballu infantil, liuhosi halo lei 4/2012 iha artigu balun ko’alia konaba ida ne’e. Lista ne’e diskute iha 27 marsu, entre SEPFOPE no MEKAE maibé serteza atu lori ba konsellu ministru seidauk hatene.

Tuir nia, presiza iha uniformizasaun konaba pensamentu traballu infantil tanba iha prekupasaun balun katak, sé hamosu entaun inan-aman sira mak infrenta situasaun ekonomiku ladun di’ak, sira laiha posibilidade, liu-liu iha área remotas, polítika sira ne’e mak hasai no labarik sira la-serbisu. “Liuhosi sosializasaun ita bele hafanu konsiénsia ita nia inan aman sira atu tau atensaun ba ida ne’e”.

Nune’e nia dehan, hein katak liuhosi komisaun nasionál kontra traballu infantil ne’ebé iha inspesaun jerál SEPFOPE mak responsaniliza ho membru sira ne’ebé noméia ba komisaun ne’e bele halo nafatin diskusaun ho nível altu hanesan ministériu sira para atu haree loloos asuntu no oinsá mak foti medida.

“Labarik sira nia fatin ba eskola no halimar, iha tempu oituan sira bele ba ajuda inan-aman, sira la’os idade iha forsa traballu, hapara presiza politika ida oinsá hare ba família mak ekonomikamente susar tebes, oinsá atu bele fó sira serbisu no sira nia rendimentu ne’e pelumenus bele to’o”, katak tan.

Nia haktuir, balun ajuda inan aman de’it, balun ajuda inan aman atu bele hetan osan. Atu hetan osan ne’e mak presiza atu haree no halo tarjetu ida ne’ebé mak presiza rezolve uluk, sira iha domestiku, agrikulura ka servisu atu hetan rendimentu. Labarik sira faan jornál, mantolun hodi ajuda inan aman, buat hirak ne’e mak halo komplika.

Realsa tan, bainhira iha diskusaun ne’ebé intensivu no kompreensivu bele foti medida sira para bele rezolve, labarik sira laiha tempu atu eskola tanba servisu todan liu, afeta ba saúde, laiha oportunidade sufisiente ba eskola, jerasaun aban bain-rua ba jerasaun ne’e, to’o tempu ida kuandu la-rezolve, partisipasaun labarik iha idade joven ba dezenvolve nasaun ne’e ladun di’ak tanba nivel edukasaun kiik.

Jornalista: Julia Chatarina

Editora: Rita Almeida

HUSIK IDA HATÁN