Konferénsia Globál G7+ sei Partisipa Hosi SekJer ONU

0
55
Foto google.

DILI, (TATOLI) – Sekretáriu Jerál G7+, Helder da Costa informa konferénsia globál G7+ ne’ebé sei realiza iha maiu 2017 konvida mós Sekretáriu Jerál Nasaun Unida, António Guterres maibé daudaun ne’e seidauk hetan konfirmasaun.

“Konvida hotu Sekretáriu Jerál ONU maibé seidauk hetan konfirmasaun, konvite hato’o ona, señor Xanana Gusmão rasik mak bá hasoru António Guterres iha dia 3 abríl foin daudaun ne’e. Ami sei hein hela notísia husi Nova Iorke”, informa Sekretáriu Jerál G7+ ba TATOLI iha Ministériu Finansa, ohin.

Konferénsia Globál ne’ebé sei realiza iha Sentru Konvensaun Dili, lidera husi Governu Timor-Leste ho parseria G7+ ne’e, konvida oradór sira hanesan Primeiru-Ministru Timor-Leste, Vise-Ministru Finansa, Panelista husi G7+, reprezentante Banku Dezenvolvimentu Islámiku, Uniaun Europeia, ONU no konvidadu sira.

Tanba razaun tempu G7+ sei hili reprezentante husi rejiaun Weste, Leste no Sentrál Áfrika, Ázia, Pasífika no Karibia ne’ebé sei partisipa husi nasaun ualu hodi prezensa iha enkontru refere.

Enkontru ne’e, Prezidente Repúblika (PR) eleitu nu’udar oradór prinsipál ba konferénsia internasionál ida ne’e hanesan oportunidade dahuluk ba prezidente foun hodi bele profere nia diskursu iha abertura.

Iha loron 18 Abríl, G7+  halo ona briefing ba PR eleitu bainhira tomada pose iha loron 19 Maiu kalan, responsabilidade kona-ba polítika esterna prezidente mós hola parte.

“Tanba G7+ nia lala’ok iha nível internasionál, ami iha obrigasaun briefing atu señor prezidente toma informasaun no nota bainhira asume knaar foun hatene ona lala’ok”, katak.

Timor-Leste lidera G7+ iha 2010 to’o 2014 no entrega ona estafeta lideransa ba Repúblika Sierra-Leone hanesan prezidente rotativu.

G7+ ne’ebé mai ho nia moto promove konstrusaun pás no konstrusaun Estadu ne’e iha nasaun membru hanesan Afganistaun, Burundi, Repúblika Áfrika Sentrál, Chad, Komoros, Côte d’Ivoire, Repúblika Demokrátika Kongo, Ginea, Giné-Bisau, Haiti, Liberia, Papua Nova Giné, Saun Tomo no Prinsípe, Sierra Leone, Illa Salomaun, Somalia, Sudaun Súl, Timor-Leste, Togo no Yamen.

Jornalista: Maria Auxiliadora

Editora: Rita Almeida

HUSIK IDA HATÁN