iklan

DESPORTU, DILI

Kompañia BLK Produs Farda Ba Klube Futeból

Kompañia BLK Produs Farda Ba Klube Futeból

Enkontru entre reprezentante Kompañia BLK no dirijentes klubu 21 ne´ebé hola parte iha LFA. Imajen Ajénsia TATOLI/Xisto Freitas

DILI, (TATOLI) – Kompañia boot ida hosi Austrália ho naran Byong Limits Known (BLK) prontu apoiu farda ba klube hamutuk 21 ne’ebé maka oras ne’e partisipa iha Liga Futeból Amadora (LFA).

Komprimisu atu apoia klube sira ne’e fó sai liuhusi inkontru entre reprezentante kompañia BLK no dirijentes klube sira ne’ebé hala’o iha Hotel Novo Turismo, Lecidere, Dili, Tersa ne’e.

Internasional Acount Manager ba Futeból Mundiál, Cerafim dos Anjos esplika katak klube sira maka sei fa’an farda sira ne’e ba adeptus ou públiku, hafoin ne’e lukru sei fahe ba parte rua (parte BLK no klube rasik).

“Ami maka produs kamizola (farda) no klube sira ajuda fa’an de’it. Hafoin ne’e, sei fahe persentajen ba malu”, esplika.

BLK nu’udar kompaña ida ne’ebé maka kuñesidu iha mundu tomak no produs kamizola desportu ho kualidade internasionál. BLK sponsorship ba klube barak iha Estadus Unidus Amérika, Papua Nova Guinei, Austrália no nasaun sira seluk tan.

Presu hosi farda refere seidauk desidi tanba prezidenti Liga Futeból Amadora (LFA), Nilton Gusmão Santos ho BLK sei deskuti oinsá atu muda presu tuir kondisaun ekonomia iha Timor-Leste.

Vise Prezidenti AD SLB Laulara, Germano da Costa konsidera katak prezensa BLK iha Timor ne’e pozitivu tanba atu loke sira nia loja iha Timor.

Nia haktuir katak produtu hosi BLK iha kualidade tanba kompañia ne’e kuñesidu iha mundu. Tuir Germano katak importante maka muda presu produtu ne’e tuir kondisaun merkadu Timor.

Alein ne’e, Prezidenti Klube Atletico Ultramar, Ano Gusmão hateten BLK hanesan kompañia ADIDAS no NIKE ne’ebé nia produtu mesak kualidade. Nia informa katak iha nasaun Ázia Pasífika ne’ebá, BLK maka númeru 1.

BLK formalmente sei produs farda ba klubu sira hahú iha Liga Futeból Amadora époka 2017 no époka sira tuir mai.

Jornalista: Xisto Freitas

Editora: Rita Almeida

iklan
iklan

Leave a Reply

iklan
error: Content is protected !!