Karketu Dere Lalenok United 6-3

0
70
Ekipa Karketu Dili FC (costum matak) no Lalenok United FC (costum mean). Imajen Ajénsia TATOLI/Xisto Freitas

DILI, (TATOLI) – Klubu primeira divizaun, Karketu Dili FC halakon klubu foun ne’ebé seidauk tama iha Liga Futeból Amadora (LFA), Lalenok United FC ho golu 6-3 iha jogu amizade ne’ebé hala’o iha Estádiu Munisipál Dili, Segunda horsehik.

Lalenok derrota golu 6 tanba impaktu hosi ekipa avansadu ne’ebé seidauk produtivu. Dala barak avansadu hetan oportunidade maibé la konsege rezulta golu barak tanba ladun aproveita bola sira hosi média.

Aleinde ne’e, Lalenok mós fraku iha parte defeza karuk. Golu ne´ebé Lalenok sofre akontese liuhusi defeza karuk. Defeza refere la konsege impede avansadu adversáriu nia agresaun iha sira nia área grandeia.

Treinadór Lalenok United FC, Muhamad Nico rekuñese katak sira nia frakeza ne’e iha avansadu, defeza nomós baliza. Tanba ne’e maka nia sei haka’as án atu hadi’a parte fraku sira ne’e molok hakat ba jogu play off iha fulan oin mai.

“Lakon ne’e la’ós kestaun ba ami. Importante maka liuhusi try out ida ne’e ami konsege indentifika ami nia fallansu sira”, Nico dehan ba jornalista sira hafoin jogu try out (amizade) ramata.

Iha parte seluk, Treinadór Karketu Dili FC, Simon Pablo hateten sira sofre golu tolu tanba impaktu hosi mudansa defeza. Nia haktuir, sira ho defeza tolu de’it no ida ne’e meiu ida atu koko produtividade defeza.

“Ami tenki koko hotu liña sira para ami bele hatene ami nia kapasidade to’o iha ne’ebé. Maibé, ha’u laiha dúvida ho ha´u nia jogadór sira nia kapasidade joga. Jogu tuir mai ami garante katak bele manán”, esklarese.

Jornalista: Xisto Freitas

Editora: Rita Almeida

HUSIK IDA HATÁN