KAK Submete ona Kazu 29 ba MP

0
84
Logo KAK

DILI, (TATOLI) – Tinan 2016, Komisaun Anti Korupsaun (KAK) finaliza investigasaun ba kazu 29 no submete ona ba Ministériu Públiku (MP).

Dadus informasaun ne’e fó sai husi Adjuntu KAK Área Prevensaun, Rui Pereira dos Santos iha salaun Maria Gorete, Sekretáriu Estadu Muller (SEM), Kaikoli foin lalais ne’e, bainhira halo aprezentasaun kona-ba korupsaun no obstakúlu no dezafiu aplikasaun konvensaun nasaun unida kona-ba korupsaun iha Timor-Leste.

Nia informa, husi kazu 29 ne’e, kazu hitu iha ona akuzasaun ba Tribunál, kazu haat arkiva, kazu rua avoka, restu MP sei halo hela prosesu.

Autopartisipasaun KAK nian, iha 2016, keixa ne’ebé tama ba iha KAK hamutuk 77, 29 sei halo hela averiguasaun, enkamiña ba PDHJ (Provedoria dos Direitos Umanos e Justiça) iha kesar rua no arkivu KAK nian iha kesar hamutuk 34.

Entretantu antes ne’e, Ofisiál Unidade Promosaun Valores no Integridade, KAK nian, Henrique Lopes informa katak dezde 2011 to’o agora KAK rejista ona 546 kazu korupsaun no seluk tan.

Husi kazu hirak ne’e, foin iha kazu 126 mak investiga hotu no haruka ba Ministériu Públiku (MP) no diriji ba tribunál.

KAK nu’udar instituisaun estadu, hanesan órgaun polísia espesializada, independente ne’ebé iha nia atuasaun la’o tuir de’it dalan legalidade no ho bjetividade, ne’ebé lei haruka.

Órgaun estadu ne’e hahú funsiona iha 22 Fevereiru 2012 no aprovadu ona husi Parlamentu Nasionál (PN) iha 12 Jullu 2009 bazea ba lei nú. 8/2009.

Estabelese KAK tanba TL rasik asina ona ratifikasaun lei konvensaun internasionál kontra korupsaun iha Viena (Austria), 10 Dezembru 2003 no 10 Dezembru 2008, ratifika konvensaun internasionál anti korupsaun iha PN, Timor-Leste.

KAK estabelese ho vizaun no misaun atu Nasaun ne’e sai Estadu demokrátiku ho kultura rejeisaun korupsaun ida mak forte ba interese no prosperiedade povu nian nomós kombate korupsaun liuhusi dalan prevensaun, edukasaun no investigasaun.

Jornalista: Rafy Belo

Editora: Rita Almeida

HUSIK IDA HATÁN