KAK “Planea” Hola Ekipamentu Espionajen Detekta Koruptór

0
167
Illustrasaun TATOLI
Adjuntu KAK Área Prevensaun, Rui Pereira dos Santos. Foto ajénsia Tatoli: Rafy Belo

DÍLI (TATOLI) — Komisaun Anti Korupsaun (KAK) planea atu hola ekipamentu espionajen hodi detekta movimentu ofisiál estadu no governu ne’ebé deskonfia sai autór ba korupsaun.

Adjuntu KAK Área Prevensaun, Rui Pereira dos Santos informa katak tuir loloos ekipamentu ne’e hola ona iha tinan kotuk (2016) maibé la konsege tanba kompañia sira ne’ebé atu fornese ekipamentu ne’e difísil tebes atu hetan.

“Ami loke, konkursu maibé la iha ema ida mak mai hatama dokumentu atu sosa,” Adjuntu Rui perante media sira hafoin halo aprezentasaun kona-ba korupsaun no obstakúlu no dezafiu aplikasaun konvensaun nasaun unida kona-ba korupsaun iha Timor-Leste, iha salaun Maria Gorete Sekretáriu Estadu Muller (SEM), Obrigado Barrack, Caicoli-Díli, Kinta (06/4).

Ne’e mak husi parte governu hanoin katak se karik KAK iha, KAK bele sosa, se la iha husi Ministériu Públiku (MP) sira bele sosa. Se lae PCIC (Polícia Ciêntifica e Investigação Criminal) tanba parte tolu ne’e serbisu kuaze besik malu.

“Se alat (ekipamentu-red) ne’e iha hodi ajuda serbisu, seidauk iha mós serbisu la’o nafatin,” adjuntu ne’e akresenta.

Tanba, tuir nia, kontestu kazu korupsaun, ninia informasaun ne’e bele mai husi testamuña sira, ema ne’ebé envolve nomós dokumentus sira ne’ebé mak liga ho kazu korupsaun. “Se ita iha, prosesu sira sei la’o hotu,” nia afirma.

Adjuntu Rui Pereira dos Santos informa mós, tinan ne’e, KAK sei hola uluk  aljema (borgol) hodi kaer funsionáriu públiku ne’ebé uza kareta no motor estadu nian ne’ebé la iha autorizasaun husi superiór sira ka lori ba pasear iha sábadu no domingo liliu bainhira sela KAK nian lansada ona.

Aljema. Ilustrasaun

“Ami hetan mak ami tenke kaer ema ne’e tau borgol hodi tau iha ami-nia sela ne’e,” nia salienta.

Entretantu kona-ba ekipamentu espionajen ne’e,  adjuntu Rui Pereira dos Santos akresenta katak ekipamentu ne’e, buat ne’ebé sensitivu, ne’ebé, bainhira to’o tempu sira iha loos ona mak sei bele ko’alia liutan.

“To’o tempu ami iha ba mak ami  dehan ami-nia sasan iha ona duke ha’u ko’alia,” nia konklui.

Jornalista: Rafy Belo / Editor: Gantry Meikana

 

 

HUSIK IDA HATÁN