João Pedro Hetan Oportunidade Estájiu iha Sporting Clube de Braga Portugal

0
276
João Pedro asina komprimísiu estájiu ho Prezidenti Sporting Clube de Braga Portugal, António Salvador da Costa (hamriik iha João Pedro nia sorin), ne´ebé asisti hosi Prezidenti LFA, Nilton Gusmão Santos (hamriik iha oin kaer surat). Imajen Mídia LFA/Dariel Valentino

DILI, (TATOLI) – Jogadór médiu avansadu hosi AD SLB Laulara, João Pedro Freitas hetan oportunidade atu ba estájiu durante tinan ida iha klube kuartu excelente iha Portugal, Sporting Clube de Braga.

Kuarta (12/4) kalan iha Hotel Timor, João Pedro asina ona kompromisu estájiu ho Prezidenti Sporting Clube de Braga Portugal, António Salvador da Costa, no sei aranka ba Portugal iha Jullu tinan ne’e, hafoin Liga Futebol Amadora époka daruak ramata.

“Prosesu ne’e hahú bainhira vizita ida ne’ebé maka ha’u halo ba Portugal iha janeiru tinan kotuk. Momentu ne’e konsege hasoru prezidenti Sporting Clube de Braga Portugal hodi troka hanoin kona-ba dezenvolvimentu futeból Timor-Leste nian. Ha’u esplika ba nia katak ami foin hahú maibé ami iha jogadór ida di’ak teb-tebes. Altura ne’e, prezidenti Sporting hakarak kuñese jogadór no promete atu mai Timor lori ba Portugal. Realidade, prezidenti klubu Portugal to’o duni atu lori jogadór refere”, Prezidenti Liga Futeból Amadora (LFA), Nilton Gusmão Santos ko’alia asuntu ne’e ba jornalista sira iha Hotel Timor, kuarta kalan.

Nia hein katak oportunidade ne’e la´ós dahuluk no ikus, maibé buat hotu-hotu depende ba jogadór sira. Joven sira hakarak ezerse futeból ho di’ak, oportunidade hanesan João Pedro nian ne’e sei mai barak.

“Ita nia Liga ne’e foin hahú iha tinan ida nia laran, infrenta dezafiu bar-barak maibé ita nia belun sira hosi Portugal kontinua hamutuk ho ita no tau-matan ba ita. Ita agradese ba solidáriu ne’ebé maka Braga hato’o mai ita”, informa.

Nia esplika katak João Pedro sei hahú estájiu uluk, nune’e bele manán ámbitu ou dimensaun jogu, depois bele joga iha ekipa prinsipál. Ida ne’e tuir kompromisu entre jogadór ho klubu.

“Tuir kompromisu ne’ebé iha katak faze estájiu ne’e durante tinan ida nia laran (2017-2018). Sé tinan ida nia la konsege adapta ho dimensaun jogu iha ne’ebá, tenke buka fali dalan seluk. Sé nia konsege adapta, sei hanaruk estájiu hodi hela kleur iha Portugal”, hateten.

Atuál Diretór Kompañia ETO afirma durante jogadór João Pedro nia estadia iha Portugal, Klube Braga maka sei responsabiliza ba alojamentu ou hela fatin.

“Ha’u deseju susesu ba ita nia alin João Pedro atu hatudu ezemplu di’ak ba komunidade nasaun irmaun iha Portugal”, sujere.

Jornalista: Xisto Freitas

Editora: Rita Almeida

HUSIK IDA HATÁN