João Pedro Atinji Ninia Mehi

0
208
João Pedro simu prenda hosi Prezidenti Sporting Clube de Braga Portugal, António Salvador da Costa (imajen liman loos), iha Hotel Timor, Kuarta kalan, liuhusi seremónia jantar konfratenizasaun ne´ebé oferese hosi Prezidenti LFA, Nilton Gusmão Santos. Imajen Mídia LFA/Dariel Valentino

DILI, (TATOLI) – Mehi sai realidade. Jogadór AD SLB Laulara, João Pedro Freitas hetan oportunidade furak. Inísiu, nia hakarak sai jogadór ne’ebé di’ak no joga iha klubu boot sira iha Europa ne’ebá, atinji ona.

Hein sura loron de’it nia semo ba Europa liu-liu Portugal atu hakle’an ninia talentu iha área futeból, klubu boot balun iha Portugal ho naran Sporting de Clube Braga.

João Pedro merese hetan oportunidade ida ne’e. Durante ne’e, hatudu ona prestasaun di’ak, nu’udar jogadór médiu avansadu ne’ebé sempre hatauk defeza adversáriu. Ninia speed extraordináriu, fíziku no tátiku di’ak tebes.

Envolvimentu iha AD SLB Laulara lori klubu refere sai kampiaun iha Liga Futeból Amadora (LFA) époka primeiru, segundu lugár iha Super Tasa 2016 no oras ne’e lori ninia klubu sai hanesan primeiru klasifikasaun provizóriu iha LFA époka 2017 ho pontus 10.

“Ha’u sente kontenti tebes bele hetan oportunidade ba estájiu iha klubu famozu ida iha Portugal, Sporting de Clube Braga Portugal. Ida ne’e nu’udar mehi ida ba ha’u no ha’u sei haka’as-án di’ak liu-tan, nune’e ha’u bele realiza ha’u nia mehi ne’e”, tenik oan hosi José Domingos da Silva Freitas no Ana da Gloria Freitas ne’ebé moris iha 20 Agustu 2000 ne’e ba jornalista sira iha Hotel Timor, kuarta (12/4).

Oan daruak hosi maun alin na’in haat ne’e triste bainhira husik hela ninia klubu, AD SLB Laulara, maibé tenke ba duni tanba ida ne’e hanesan oportunidade.

Kona-ba família, nia hateten suporta tebes ninia talentu iha área futeból no kontente tebes bainhira hetan oportunidade ne’e.

“Ha´u nia mensajen ba maun alin sira katak maske ita nia Nasaun foun no ita nia liga foin amadora maibé keta tauk mehi. Tenke mehi sai jogadór ida di’ak hodi hasa’e ita nia Nasaun no liga nia prestiju iha mundu”, dehan.

Jornalista: Xisto Freitas

Editora: Rita Almeida

HUSIK IDA HATÁN