DILI (TATOLI) – Atu dezenvolve kapasidade funsionáriu Dirasaun Nasional Servisu Agua (DNSA) nian, Ajensia ba Kooperasaun Internasional husi Japaun (JICA), durante tinan lima nia laran kolabora ho governu Japaun (Chiba Prefecture) koloka Espesialista Téknika ba tempu badak nomós tempu naruk.
Objetivu hosi servisu ne’e, atu funsionáriu DNSA sira hatene oinsa halo operasaun no manutensaun ba Plantas Tratamentu Bee (WTP – Water Treatment Plant) nomós suporta ba servisu fornesimentu bee iha sidade Díli. Kapasidade ne’ebé aumenta husi funsionáriu DNSA sira, liuhosi koperasaun tekniku ne’ebé bele aplika ba servisu loron-loron.
Husi loron 13 Janéiru to’o loron 5 Marsu 2017, hamutuk espesialista (tempu badak) nain neen husi Chiba Prefectural Waterworks Bureau mai vizita ona Timor-Leste.
Treinamentu ba funsionáriu DNSA konaba operasaun WTP hala’o durante tempu udan ho bee ne’ebé foer makaas, atu funsionáriu sira hatene oinsa halo manutensaun ba mákina no ekipamentus iha WTP nomós halo deteksaun ba kanu bee ne’ebé kuak.
Funsionáriu nain lima husi DNSA, tuir ona treinamentu iha Bangkok durante semana ida iha Metropolitan Waterworks Authority of Thailand kona ba Sistema Distribuisaun Bee husi loron 11 to’o 19 Marsu 2017.
Jornalista: Julia Chatarina
Editor: Gantry Meilana