Investimentu Rekursu Umanu mak Abut

0
50
Ministru Edukasaun, António da Conceição. Foto: Media FDCH

DILI, (TATOLI) – Ministru Edukasaun, António da Conceição hatete governu fó bolsa estudu ba veteranu no kombatente nasionál nu’udar komprímisu ida ne’ebé governu halo atu investe iha rekursu umanu.

Bolseiru sira. Foto: Media FDCH

Iha salaun Ministériu Defeza, Fatuhada, Dili, ohin nia reforsa katak halo ajustamentu ba dezenvolvimentu nasionál maibé presiza mós halo investimentu ba rekursu umanu. “Investimentu ne’ebé nia abut, karik, ema la “fukit” mak rekursu umanu”, akresenta.

Rekursu umanu ho kapasidade tékniku profesionál di’ak sertamente ba oin nafatin, dezenvolvimentu sei bele responsabiliza nafatin husi nia ema sira. “Ida ne’e mak aposta ida ne’ebé mak governu tau iha prioridade”, hateten governante ne’e.

Konklui, ministru edukasaun ne’e mós hateten katak nu’udar estudante tenke lori aan la’o tuir ritmu teknolojia. “Peskiza no investigasaun sientífika buat ne’ebé mak hanesan xave tebes atu ita lori ita-nia aan la’o tuir era teknolojia ninian”, reforsa.

Nune’e mós nu’udar oan iha família tenke sai nu’udar lilin hodi fó nafatin naroman ba inan-aman sira atu nune’e inan-aman sira labele lakon esperansa, hakotu.

Jornalista: Rafy Belo

Editora: Rita Almeida

HUSIK IDA HATÁN