Instituisaun Haat Fahe Informasaun Hasa’e Koñesimentu Funsionáriu SEM

0
39
Funsionáriu SEM durante atividade formasaun. Foto dokumentu: SEM

DÍLI, (TATOLI)—Sekretáriu Estadu Muller (SEM) konvida Komisaun Anti Korupsaun (KAK), Provedória Direitu Humanu no Justista (PDHJ) no Komisaun Funsaun Públika (KFP) no Inspesaun Jerál Estadu (IJE) hodi fahe informasaun no aumenta koñesimentu funsionáriu SEM nian, iha Salaun Maria Goreti, SEM, Caicoli-Díli, kinta  (06/04/2017).

Diretór Jerál SEM nian, Armando da Costa. Foto: SEM

Iha atividade fahe informasaun no aumenta koñesimentu ne’e ko’alia liu kona-ba: “Utilizasaun fundu no bens públiku ne’ebé responsável no integro”, “Korupsaun no obstakúlu no dezafiu aplikasaun konvensaun nasaun unida kona-ba korupsaun iha Timor-Leste”, “Integridade funsaun públika no profisionalizmu” no “lejislasaun foun balun ne’ebé relevante”.

Diretór Jerál SEM, Armando da Costa informa katak atividade ne’e alende halo ba funsionáriu sira iha kapitál Díli halo mós ba pontu fokál SEM nian sira iha Munisípiu 12 inklui Rejiaun Autonoma, Oe-cusse atu bele hala’o sira-nia kna’ar ho di’ak.

“Hodi minimiza erru sira ne’ebé karik ikus mai bele lori funsionáriu sira hasoru problema sira hanesan mal administrasaun ka relasiona ho korupsaun,” haktuir diretór ne’e.

Alende objetivu ne’e, objetivu seluk husi atividade ne’e mak halibur espertu sira husi KAK, IJE, PDHJ, KFP no SEM rasik hodi fahe informasaun no esperiénsia ba funsionáriu SEM tomak kona-ba asuntu relevante ne’ebé liga ho tema jerál: “korupsaun no governasaun di’ak”.

Hasa’e funsionáriu SEM hotu, feto no mane sira-nia koñesimentu kona-ba tema refere hodi nune’e serbisu di’ak liutan ho responsabilidade, integridade no livre husi risku ba korupsaun.

Inklui, fahe/hakle’an informasaun kona-ba lejislasaun relevante sira ne’ebé produz tiha ona husi KFP no funsionáriu sira (kargu diresaun no xefia inklui funsionáriu sira tomak) atu hothotu bele apar no bele implementa.

Husi atividade ne’e, rezultadu ne’ebé espera husi SEM mak instituisaun relevante bele identifika material ne’ebé adekuadu duni ba aumenta informasaun no koñesimentu funsionáriu SEM nian.

Tuir mai, funsionáriu SEM nian bele hasai dúvida hotu ne’ebé mak durante ne’e iha, bele apar ona ho  Standar Operational Producers (SOP) ka Padraun Prosedur Operasionál SEM nian.

Inklui, SEM bele sai instituisaun modelu livru husi kualker tipu korupsaun no prosedimentu irregular.

Partisipante ba atividade fahe informasaun ne’e kompostu husi funsionáriu SEM ne’ebé hamutuk, feto na’in 51 no mane na’in 35 ho durasaun tempu loron ida.Entretantu tema jerál ba atividade ne’e mak: “Korupsaun no governasaun di’ak”.

Jornalista: Rafy Belo / Editor: Gantry Meilana

HUSIK IDA HATÁN