Ilidio : Dezenvolvimentu ne’e Tenke Prátika

0
43
Ilidio Ximenes. Foto SEPFOPE

DILI, (TATOLI) – Sekretáriu Estadu Polítika ba Formasaun Profisionál no Empregu (SEPFOPE), Ilidio Ximenes da Costa hatete dezenvolvimentu la’ós ko’alia no tuur maibé prátika mak foin hatudu bele ka la’e no ida ne’e mak foin ko’alia sobre dezenvolvimentu.

Nune’e, Ilidio husu ba formandu 133 ne’ebé simu ona sertifikadu hafoin tuir kursu iha Sentru Nasionál Empregu no Formasaun Profisionál (SNEFP) atu tau iha prátika.

Tanba empreza no povu sira presiza sira-nia skill no liuhusi skill ne’e hatudu tiha ona mak hanesan uma lima ne’ebé halo ho fatuk iha Manatutu no iha Aileu halo ho tizolu.

“Ne’e la’ós emprezáriu mak kaer, ita fó ita-nia sentru formasaun, alin sira ne’ebé aprende tizolu mak halo. Entaun, teoria no prátika ne’ebé iha sira konsege halo tiha ona”.

Rezultadu uitoan ka barak ne’e mak husi formandu sira halo no apresia mós ba estudante husi F-FDTL tanba halo ona saneamentu públiku iha Atabae nomós halo automotivu.

“Hakarak dehan imi la’ós aprende teoria de’it maibé imi husik hela imi-nia liman fatin”, dehan.

“Skill iha, transfere sai asaun ho rezultadu pozitivu no balun negativu maibé aprende husi sala mak foin bele di’ak. Sé hakarak perfeitu buat hotu lala’o, desizaun mós nia lafoti, osan mai  filafali ba kofre Estadu”.

Sekretáriu Estadu ne’e informa ba formandu sira, Governu sempre iha polítika atu ajuda formandu sira liuhusi SEPFOPE ho programa empregu rurál iha atividade kona-ba auto empregu ne’ebé sira bele hatama sira-nia proposta no entrega ekipamentu ba sira.

Jornalista: Maria Auxiliadora

Editora: Rita Almeida

HUSIK IDA HATÁN