Hetan Prosperidade, Ita Tenke Serbisu Maka’as

0
76
Prezidente Repúblika, Taur Matan Ruak bainhira aprejenta visaun iha aula jerál Universidade Dili, foin lalais ne'e. Foto Tatoli

DILI, (TATOLI) – Xefe Estadu, Taur Matan Ruak afirma katak atu hetan prosperidade ida, ita tenke serbisu maka’as, tenke sente katak Nasaun ne’e, ukun aan ne’e ita hotu nian.

“Iha uma, iha to’os ka natar, iha eskola, iha funsaun públika, iha ne’ebé de’it. Tenke sai di’ak liu”, Prezidente Taur akresenta, foin lalais ne’e, iha Universidade de Díli (UNDIL), Mascarenhas.

Taur Matan Ruak konsidera prezente ne’e minutu de’it basá prezente ne’e iha bainhira ko’alia de’it liu ida ne’e la iha ona. “Iha de’it mak futuru. Signifika ita iha, ita la para, ita la’o hela”, akresenta.

Karik hanoin prezente ne’e buat ida boot hanesan livru ne’e hanoin sala. Prezente ne’e hanesan mós kadernu ne’ebé loke, loke dadauk tahan ida ba tahan ida, hakat ba dadauk. Ba ona. Tempu mós hanesan ne’e.

Jornada ba futuru, futuru ida ne’ebé ita ko’alia ne’e é o passado ou futuro do passado. “Saida mak halibur ita iha pasadu? Ita-nia sofrimentu, ita-nia mate, ita-nia terus, ita-nia sakrifísiu, ita-nia mízeria, ita-nia lakon, matan-been, ida ne’e mak halibur ita. Halibur tanba saida, halibur tanba mehi ida ba ukun aan”, haktuir.

Nia reforsa ukun aan halibur, haluha konsekuénsia sira hotu ba vida, ba família no Nasaun hodi sakrifika ba ukun aan.

Haree didi’ak ukun aan, konta didi’ak, la hotu la’ós tempu la iha, to’o momentu ruma sente di’ak liu lalika hanoin tanba kadavez matan-been sulin, dolár la hatene tuir. Moras tebes, ida ne’e mak halo ita luta. “Luta tanba ema dehan kuantu mais ha’u terus, mais ha’u luta”, salienta.

Tanba luta la iha ona, ita mós la iha ona. “Kuantu mais ida mate iha ita-nia sorin, mais determinasaun maka’as liutan. Ne’e ita la konta ona mate, ita konta de’it ha’u hakarak hetan ukun aan, ida ne’e mak ita nian,” eis-gerilleiru ne’e haktuir.

Hodi hetan ukun rasik aan, veteranu tinan 24 ne’e hatutan kuaze lakon ema rihun atus rua. Pasadu ne’e sofrimentu, terus no sakrífisu ba objetivu ukun rasik aan.

“Se pasadu ida ne’e mak halibur ita timoroan hotu, entaun saida mak sei halibur ita timoroan iha futuru?”, kestiona.

Reforsa tan, buat ne’ebé halibur iha futuru mak moris di’ak, prosporiedade tanba ne’e duni ita tenke serbisu maka’as iha ne’ebé de’it hahú agora kedas.

Jornalista: Rafy Belo

Editora: Rita Almeida

HUSIK IDA HATÁN