Hader iha Misa Páskua, Ran La Maran Saugati

0
82
Misa resurreisaun Jesus Kristu iha Katedral Dili, Sábadu kalan. Imajen Ajénsia TATOLI/Xisto Freitas

DILI (TATOLI)— Bispu Dioseze Dili, Don Virgílio do Carmo subliña katak sarani sira hader iha misa kalan Páskua nu´udar símblu fiar ba Maromak ne´ebé moris hikas ona hosi mate.

“Ita hotu ohin kalan hader hamutuk iha tinan ida dala ida. Ita hader la saugati leet, ran la maran saugati no la kole leet. Basá, ita presiza hakbesik ba We-Matan mundu fiar nian maka Maromak moris hikas,”  Bispu hato´o ninia omília ne´e liuhusi misa resurreisaun Jesus Kristu iha Igreja Katedral Dili, Sábadu (15/04/2017).

Liafuan moris hikas (resurreisaun), Bispu dehan, hafoun nafatin sarani sira. Líder Igreja Katólika hatutan katak hakarak moris iha dame presiza hakbesik ba We-Matan Lulik (Maromak) no rahun di´ak ba sira ne´ebé hatene halo di´ak ba nia moris ou ba nia isin no klamar liuhusi hakbesik ba Maromak.

“Ita presiza fó agradese ba Maromak tanba Nia bele hakiak fiar iha ita atu ita nia fiar labele lakon. Fiar ida ne´e tenki buras ba nafatin,” nia esplika hodi salienta lilin-boot ne´ebé sarani sira hahi dala ida iha tinan ida hodi simu Paskál ida ne´e reprezenta Jesus nia isin ne´ebé hetan fali ona moris.

Misa resurreisaun Maromak nian ne´ebé hala´o iha tuku 20:30-00:00 ne´e inísia ho bensaun ba bee, lilin no leitura hitu. Partisipa iha misa ne´e maka Primeiru Ministru, Dr. Rui Maria de Araújo ho nia espoza, Ministru Planeamentu Estratéjiku, Kay-Rala Xanana Gusmão, Sekretáriu Estadu Juventude no Desportu, Leovigildo Hornai no sarani sira rihun ba rihun.

Jornalista: Xisto Freitas / Editor: Gantry Meilana

 

HUSIK IDA HATÁN