Governu ‘La Ignora’ Timoroan iha Korea Sul

0
89
Traballadór timoroan sira molok atu ba serbisu iha Korea Sul hasai foto hamutuk. Foto: Media Sepfope

DILI, (TATOLI) – Tensaun polítika no seguransa entre Estadu Unidu Amérika (EUA) ho Korea Norte sei iha faze krítiku maibé governu Timor-Leste la ignora nia sidadaun sira.

Ministru Negósiu Estranjeiru no Kooperasaun, Hernani Coelho hateten oras ne’e dadaun governu halo hela kordenasaun ho governu Korea Sul liuhusi sira-nia autoridade kona-ba traballadór timoroan sira. “Entaun ami sempre iha koordenasaun”, ministru perante profisionál komunikasaun sosiál iha Ministériu Negósiu Estranjeiru no Kooperasaun (MNEK), Praia dos Coqueiros, segunda (24/4).

Timoroan sira ne’ebé oras ne’e dadaun sai traballadór iha Korea Sul hala’o serbisu iha ámbitu programa ba Ázia tomak ne’ebé hanaran Employment Permite System (EPS). Programa ne’ebé mak la’ós ba timoroan de’it maibé mós ba Indonézia, Vietname, Laos no parte sira hotu.

EPS ho universe kuaze traballadór rihun 50 mak ba serbisu iha ne’ebá husi nasaun hotu. Tensaun entre EUA ho Korea Norte, nia akresenta katak oras ne’e dadaun la iha alerta ruma relasaun ho medida kona-ba nesesidade halo evakuasaun ba traballadór sira iha Korea Sul.

“Oras ne’e dadaun ami iha liña jerál ne’ebé bele aplika ba sidadaun estranjeiru iha Korea Sul. Purtantu, planu kontijénsia sira ne’e, mekanismu sira ne’ebé bele tau iha konsiderasaun”, governante ne’e akresenta.

Ministru ne’e haktuir, traballadór timoroan sira ne’ebé dadaun ne’e iha Korea Sul kuaze 2000 resin. Sira hala’o kna’ar iha área oioin, maioria iha área peska, ortikultura no seluk tan.

Jornalista: Rafy Belo

Editora: Rita Almeida

HUSIK IDA HATÁN