Governu Esforsu Aumenta Sentru Votasaun iha Estranjeiru

0
65
Asaun protesta hosi estudante sira iha Indonézia ne'ebé la-hetan oportunidade hodi partisipa eleisaun prezidensiál foin lalais ne'e. Foto espesiál

DILI, (TATOLI) – Governu liuhosi Ministériu Negosiu Estranjeiru no Koperasaun (MNEK) sei halo esforsu ho Ministériu Administrasaun Estatál no Sekretariadu Tékniku Administrasaun Eleitórál (STAE) atu haree nesesidade no relevansia partisipasaun eleitór hotu iha estranjeiru.

Vise MNEK, Roberto Soares. Foto dokumentasaun Tatoli

Vise-MNEK, Roberto Soares ba jornalista sira iha Palásiu Governu ohin, relasiona ho partisipasaun Timoroan iha Portugal no Austrália de’it mak ezerse sira nia direitu iha eleisaun prezidensiál maibé Inglatera, Korea Sul no nasaun sira seluk la-tuir festa demokrasia, maske nune’e esforsu hotu sei bele realiza iha eleisaun parlamentár.

“Posibilidade haluan tan partisipasaun eleitór sira iha nasaun Inglatera, Korea Sul no nasaun sira seluk atu bele partisipa iha eleisaun lejislativa”, hatutan.

Ko’alia kona-ba tempu ne’ebé limitadu, Vise-MNEK esplika, bazikamente haree tempu jerál, konserteza tempu limitadu tebes tanba eleisaun parlamentár iha fulan Jullu, maibé tau esforsu hamutuk atu haree partisipasaun hotu-hotu nian.

Esforsu sira ne’e, sei aprejenta iha Konsellu Ministru hodi aprova hafoin informa ba públiku tomak atu hatene nasaun ne’ebé mak atu halo resensiamentu no tuir eleisaun lejislativa.

“STAE, ESTATÁL no MNEK semana oin sei aprezenta nesesidade haluan partisipasaun eleitór ba eleisaun parlamentár iha rai liur, maibé ami haree hotu kestaun rekursu úmanu sira, nune’e bele aprezenta iha Konsellu Ministru atu hetan aprovasaun”, informa tan.

Entretantu, Diretór Jerál STAE, Acilino Manuel Branco hateten, kalendáriu resensiamentu no atualizasaun baze dadus  hetan ona aprovasaun hosi Konsellu Ministru atu kontinua atende komunidade sira hodi halo resensiamentu iha 8 abril to’o 26 maiu, tantu iha rai laran no estranjeiru.

Resensiamentu iha Portugal, Austrália, Inglatera, Korea Sul no nasaun sira seluk signifika aumenta sentru votasaun iha rai laran no iha rai liur, maske atu aumeta sentru votasaun, STAE halo ona preparasaun ho governu lokál sira atu identifika fatin ne’ebé dook no númeru eleitór ne’ebé barak. 

Jornalista: Zezito Silva

Editora: Rita Almeida

HUSIK IDA HATÁN