Governu Aprova Sistema Asycuda World

0
97
Enkontru Konsellu-Ministru sira iha loran 25/4/2017. Foto GPM.

DILI, (TATOLI) – Governu aprova ona rezolusan ida kona-ba adosaun Sistema Informátika Automated System for Custom Data (ASYCUDA) World hanesan plataforma ba implementasaun janela únika eletrónika Timor-Leste.

Rezolusaun ne’e aprezenta husi Ministériu Finansa oinsá mak departamentu ka instituisaun relevante Estadu nian ne’ebé servisu iha área fronteira hanesan fronteira rai, portu no aeroportu utiliza sistema ida de’it.

Vise-Ministru Finansa, Helder Lopes ba TATOLI informa, sitema ne’e mak ASYCUDA ho intensaun katak iha janela únika, iha fatin ida de’it ba kliente sira liuliu ba setór privadu sira ne’ebé hakarak halo komérsiu bá fatin ida de’it hodi trata dokumentu para iha efisiénsia servisu ne’ebé fornese ba sira.

“Tanba ne’e mak Konsellu Ministru aprova ona rezolusaun, bainhira rezolusaun ida ne’e asina no publika, klaru katak entidade ka instituisaun relevante sira ne’ebé nia naran tama iha rezolusaun sira sei utiliza sistema ASYCUDA”, Vise hato’o iha Muzeu Rezisténsia, horisehik.

ASYCUDA mak sistema ne’ebé alfándega sira utiliza nune’e Ministériu Finansa iha papél no responsabilidade atu instala iha sevisu fatin hanesan autoridade portu no aeroportu, transporte, kuarentena para iha kondisaun hodi utiliza sistema ne’e tuir rezolusaun haruka.

Aprovasaun ba sistema ASYCUDA World ne’e iha reuniaun Konsellu-Ministru iha loron 25 abríl 2017.

Sistema ne’e lansa iha Cabo Verde loron 12 fulan-janeiru 2016. Entretantu antes ne’e elementu eletróniku ne’e mosu iha 1985 no nasaun liu 90 mak implementa.

Jornalista: Maria Auxiliadora

Editora: Rita Almeida

HUSIK IDA HATÁN