Governu Aprejenta Konvensaun Direitu Tasi ba PN

0
49
Logo IMO

DILI, (TATOLI) – Vise Ministru II Obras Públikas, Transportes no Komunikasaun (MOPTK), Inâcio Moreira informa konvensaun internasionál tolu konaba direitu tasi nian sei diskute iha Parlamentu Nasionál (PN) tanba Timor-Leste (TL) adere ona ba International Maritime Organization (IMO).

Vise Ministru II Obras Publikas, Transportes no Komunikasaun (MOPTK), Inâcio Moreira

“Timor-Leste adere ona ba International Maritime Organization bazeia ba rezolusaun Parlamentu Nasionál númeru 10/2004 no Konvensaun Nasoens Unidas ba direitu tasi nia ne’ebé hanaran CNUDM/UNCLOSED ratifika ho rezolusaun Parlamentu Nasionál númeru 17/2012”, tenik governante ne’e ba Tatoli iha ninia servisu fatin, segunda, (24/4).

Nia hatutan: “Hakarak ka lakohi tenke hakruk ba konvensaun internasionál sira ne’ebé iha relasaun ba área refere hodi hala’o atividade”.

Hafoin organizasaun internasionál sira adere ho rezolusaun PN, konserteza konvensoen sira halo atividade iha relasaun ba área relevante, tenke ratifika mós ba PN.

Proposta tolu ne’ebé ninia parte aprejenta semana rua liuba mak Safety of Life at Sea (SOLAS) hanesan konvensaun ida ba nasaun hotu-hotu ne’ebé halo atividade iha tasi laran, presiza tau ba seguru vida, ema ida hala’o atividade iha tasi nia tenke garante ho kondisaun saida de’it tanba konvensaun ne’e mak obriga.

Konvensaun daruak mak Prevention of Pollution from Ships (MARPOL) atu kombate poluisaun no ró hotu-hotu iha tasi laran, lori kargu ne’ebé ho forma poluisaun tenke kuidadu para labele halo tasi fo’er.

Konvensaun ikus mak Standards of Training, Certification and Watchkeeping for Seafarers, (STCW78) mak fó kualifikasaun standarte ba komandante, ofisiais no pessoál sira liuhosi formasaun, sertifikasaun no servisu iha ró merkantes marítimu nian.

Proposta sira ne’e, KM aprova ona iha loron 11 fulan-abril 2017.

IMO hanesan ajénsia Organizasaun Nasoens Unidas (ONU) ho responsabilidade regula transporte marítima no estabele iha Jenebra tinan 1948, vigor iha 1959.

Sede agora dadaun iha Londres, Reino Unidu ho membru nasaun hamutuk 172 no membru nasaun assosiadu hamutuk tolu. Timor-Leste tama iha membru IMO iha 2005.

Jornalista: Julia Chatarina

Editora: Rita Almeida

HUSIK IDA HATÁN