G7+ Promove Kooperasaun F2F

0
114
Helder da Costa. Foto espesiál

DILI, (TATOLI) – Sekretáriu Jerál G7+, Helder da Costa hatete G7+ daudaun ne’e promove kooperasaun frajil ba frajil (fragile to fragile cooperation-F2F) iha área tolu kona-ba pás no rekonsiliasaun, jestaun rekursu naturál nian, oinsá mak atu jere  reseita doméstika ne’ebé ko’alia liu ba jestaun finansa públika.

Helder da Costa ba TATOLI iha Ministériu Finansa informa, ohin, aleinde ne’e, oinsá jere prezensa misaun Nasaun Unida iha país sira pós-konflitu.

“Entre 20 países iha G7+ ne’e pur volta 13 países mak iha misaun pás Nasaun Unida nian. Graças a Deus, Timor-Leste sai hanesan primeiru país ne’ebé hatete obrigadu barak peace keeping force iha dezembru 2012”, dehan.

Nasaun daruak ne’ebé tuir TL mak Siera-Leone no seluk hanesan Liberia no Haiti ne’ebé daudaun diskute hela oinsá mak sai lalais husi misaun ONU nian tanba indikadór ne’ebé hatudu susesu bainhira laiha ona misaun ONU.

Helder afirma TL tenke orgullu tanba sai nu’udar barómetru susesu ba rai seluk no haree ba TL hanesan forma ezemplár ida tanba ho esperiénsia ne’ebé iha konsege fahe ba rai seluk.

Ho rekursu ne’ebé limitadu, TL konsege ajuda hala’o eleisaun iha Giné-Bisau, Saun Tome no Prínsipe ho Repúblika Sentrál Afrikana.

“País tolu ne’e graças Timor-Leste nian ajuda. Ida ne’e mak ita dehan fragile-to-fragile cooperation”, Helder katak.

Jornalista: Maria Auxiliadora

Editora: Rita Almeida

HUSIK IDA HATÁN