Forsa EUA Mai TL Ne’e Misaun Umanitária

0
200
Forsa EUA bainhira to’o iha TL. Foto Media embaixada EUA

DILI, (TATOLI) – Ministru Negósiu Estranjeiru no Kooperasaun, Hernani Coelho informa katak aviaun forsa Estadu Unidu Amérika (EUA), Boeing C17-Globe Mastre III mai iha Timor-Leste (TL), tuun iha áeroportu Internasionál Nicolau Lobatu, Dili, semana kotuk ho misaun umanitaria.

Ministru Negósiu Estranjeiru no Kooperasaun, Hernani Coelho. Foto Tatoli: Rafy Belo

“Sira mai ne’e iha ámbitu kooperasaun defeza militár ne’ebé ita iha ho forsa amerikanu dezde uluk, dezde 2002”, informa ministru Hernani iha Ministériu Negósiu Estranjeiru no Kooperasaun (MNEK), Praia dos Coqueiros, segunda (24/4).

Forsa amerikanu sira ne’ebé mai ne’e la’ós forsa funu nian maibé sivil katak forsa sira ne’ebé sira-nia atividade mak umanitária.

“Entaun prioridade sira ne’ebé mai ne’e, mai halo troka, ba sira ne’ebé mak iha ne’e tiha ona”, informa tan.

Forsa EUA sira ne’ebé mai ne’e dezde 2002, mai hadi’a estrada, universidade no seluk tan.

“Sira ne’e tipu enjeñária, sira-nia konsentrasaun barak liu ba iha apoiu umanitária. Foin dadauk ne’e, sira na’in rua nolu mak mai para halo substituisaun ba sira seluk ne’ebé mak iha ne’e”, hatutan.

Governante ne’e mós haktuir, forsa amerikanu sira ne’e mai halo rotasaun, lori mós ekipamentu foun no tuan sira lori fila fali. “Sira ne’e forsa naun kombatente, la’ós forsa funu nian”, reforsa.

Buat ne’ebé forsa amerikanu sira ne’e lori mak ekipamentu ba serbisu enjeñária nian. “Tanba ne’e fó hatene ba populasaun sira katak forsa sira ne’e nu’udar kontijente sívil ne’ebé mak fó apoiu, atividade umanitária”, nia fó hatene.

Ministru negósiu estranjeiru ne’e informa katak prezensa forsa EUA sira ne’e la iha ligasaun ho situasaun Korea Norte maibé mai iha ámbitu kooperasaun liliu iha atividade umanitária.

Jornalista: Rafy Belo

Editora: Rita Almeida

HUSIK IDA HATÁN