Ezekusaun OJE 2017 Atinje Porsentu 25

0
83
Foto, Google.com

DILI, (TATOLI)- Ezekusaun Orsamentu Jerál Estadu (OJE) trimestre dahuluk 2017 nian, atinje ona pur volta porsentu 25, informa Vise-Ministru Finansa, Helder Lopes, iha Palácio do Governo.

Helder hatete, ezekusaun ne’e ideál tanba quarter ida, fulan tolu husi Janeiru to’o Marsu nia laran bele ezekuta porsentu 25 husi totál ezekusaun orsamentu ne’ebé iha.

Iha enkontru Konsellu Ministru nian, Ministériu Finansa (MF) aprezenta lala’ok ezekusaun nian husi liña ministeriál, órgaun Estadu ne’ebé autónomu finanseiru ou sein finanseiru nomós munisípiu.

“Ami foti dadus husi sistema hodi aprezenta ba membru Governu sira sobre lala’ok ezekusaun ne’e halo oinsá, depois dezafiu ne’ebé hasoru iha prosesu ezekusaun tanba objetivu husi aprezentasaun ne’e, oinsá mak ita hadi’a prosesu ezekusaun ne’e para fasilita di’ak liután ezekusaun,” Helder dehan.

MF iha aprezentasaun ne’e hatudu katak bele monitoriza prosesu ezekusaun liuhusi sistema Payment Request Tracking System (PRTS).

“Ezemplu, ha’u-nia diretór ida hatete pagamentu ida ne’e agora para iha ne’ebá, ha’u lapresiza ka’er nia liafuan, fó de’it dadus mai hatama iha sistema, ha’u bele hatene katak nia liafuan ne’e loos ka sala. Ne’e mak ami hatete ba membru Governu sira, dalabarak diretór sira ita husu informasaun sira dehan pagamentu ne’e iha ne’e ona, mas kuandu ita ladún akompaña sistema ita lahatene informasaun ne’e loos ka sala,” Helder relata.

Iha aprezentasaun ne’e membru Governu hotu konkorda katak presiza hatene sistema uitoan para bele ajuda monitoriza lala’ok ezekusaun.

Tuir Portál Transferénsia Timor-Leste nian ba ezekusaun OJE 2017 ho despeza US$ 1,386,825,735.00, kompromisu US$ 164,156,268.10, obrigasaun US$ 112,942,294.73, reál US$ 242,904,917.56, saldo US$ 866,822,254.61, ho totál ezekusaun to’o ohin loron porsentu 25.6.

Jornalista : Maria Auxiliadora)

HUSIK IDA HATÁN